– Mii leat lokten bušeahta 7,5 miljon ruvnnus 11,7 miljon ruvdnui. Mii leat maiddái lasihan stuorámus doarjaga 300 000 ruvnnus 500 000 ruvdnui investeremiidda ja prošeavttaide, dadjá duhtavaš sámediggeráđđi Silje K. Muotka.
Sámediggeráđđi Silje Karine Muotka (Foto: Kenneth Hætta)
Sihke eanadoallu, boazodoallu ja guolástus leat deaŧalaččat ássamii ja sámegielaide sámi guovlluin.
– Dán mii dahkat sihkkarastin dihtii buoret finánsaeavttuid dáid sámi ealáhusaide. Nubbi eará bealli lea dat go lea dárbu loktet vai sáhttá čuovvut gollolassáneami servodagas. Mii oaidnit ahte golut lassánit jagis jahkái, muhto ii dienas, dadjá Muotka.
– Mii áigut geassemánus árvvoštallat ahte galggašeimmet go viiddidit vuođđoealáhusaid vuoruhemiid reviderejuvvon bušeahtas, dadjá Muotka.
Eanadoalus bisuha Sámediggi doarjaga huksemii daid doaluide mat leat doaimmas, ja dat mearkkaša dan ahte Sámediggi sáhttá addit doarjaga divodemiide ja laktavistái.
Mariidnaealáhusain bisuha Sámediggi seamma áŋgiruššama árbevirolaš bivddus ja guollevuostáiváldinrusttegiid ektui.
– Muhto mii oaidnit ahte bohtet eará miellagiddevaš šlájat go guolli, nugo debbot. Dás lea stuorra márkanvejolašvuohta min vuotnaguovlluin, dadjá Muotka.
Maiddái boazodoallolávdegoddái lea lasáhus 0,5 miljon ruvnnus 1,8 miljon ruvdnui.
– Dát bargu lea deaŧalaš boazodoallopolitihka boahtteáigái, dadjá Muotka.
Gažaldagaide vástida dahje addá jearahallama sámediggeráđđi Silje Karine Muotka, mob. +47 984 87 576, silje.karine.muotka@samediggi.no