Spittás lea leamaš mearrasámi ássan máŋggaid čuđiid jagiid. Deaŧalaš oassi dan vásáhusas maid sii fállet, lea ahte turisttat besset oahpásmuvvat sámi árbevieruide, dál ja ovddešáiggiin. Fitnodat áŋgiruššá maiddái dakkár surggiiguin go guolástemiin, guovssahasain, fálláin ja buokčalemiin.
- Lea hui buorre go fitnodat čalmmustahttá mearrasámi historjjá. Sápmi dárbbaša ollu fitnodagaid mat gaskkustit dán oasi min historjjás, dadjá sámediggeráđđi Silje Karine Muotka (NSR).
Spittá lea suolu Návuona suohkanis Romssa ja Finnmárkku fylkkas. Suolu lea Návuonas. Nu mo daddjojuvvui, de lea fitnodat ožžon doarjagat fanasinvesteremii vai sii sáhttet sáhtostit báikkálašolbmuid, turisttaid ja earáid Spittái.
- Mii dárbbašit dakkár fitnodagaid go Spildra North AS, mat dustet áŋgiruššat turismmain sámi guovlluin. Nu sii sáhttet leat mielde ceggemin eanet bargosajiid Návutnii, juoga mii guorrasa min ealáhuspolitihkkii, dadjá Muotká.
- Seammás lea deaŧalaš ahte báikkálaš olbmuin lea vejolaš galledit Spittá, danne lea deaŧalaš doarjut dán investerema. Mii sáhttit leat mielde sihkkarastimin guovllu ássama, seammás go báiki šaddá geasuheaddjin, dadjá Muotká loahpas.
Sámediggi várre jahkásaččat doarjjaruđaid máŋggabealat ealáhuseallima doaimmaheddjiide nannen dihtii sámi guovlluid ealáhuseallima. Doarjja Spildra North AS:i juolluduvvo ortnegis Ealáhuseallin, lotnolas- ja meahcceealáhusat, árvoháhkan ja ealáhushutkan.
Gulahalli gažaldagaid ja jearahallama oktavuođas lea sámediggeráđđi Silje Karine Muotka, mob. +47 984 87 576, silje.karine.muotka@samediggi.no