Ođđa gávppi interievra ja designa lea sámi historjá ja designa inspireren. Nordnorsk Kunstmuseuma áigumuš lea maid ahte sámi dáidda ja duodji galgá dahkat unnimusat 50 % ođđa gávppi vuovdimis..Sámediggeráđi Silje Karine Mutoka (NSR) oaivvilda ahte dát huksen šaddá ollu mearkkašit sámi dáidagii ja duodjái, ja lea ilus go Nordnorsk Kunstmuseum lea bidjan johtui dán prošeavtta.
– Mun illudan go sámi buktagat dál ožžot hui buori rámma ja go seamma sajis sáhttá gávdnat sámi buktagiid main lea buorre kvalitehta. Nordnorsk Kunstmuseum lea ollu jagiid čájehan duohta beroštumi sámi dáidagii ja duodjái. Danne lea midjiide hui miellagiddevaš oaidnit mo dál ožžot áigái ođđaáigásaš ja profeššunealla gávpeinterievra mas sámi árbevierru ja historjá lea vuođđun, dadjá Muotka.
Nordnorsk Kunstmuseum háliida leat aktiivvalaččat mielde oainnusmahttimin, fátmmastahttimin ja promoteremin sámi dáidaga ja ovdanbuktima Romssas ja riikkaoasis.
– Ođđa ja buoret museagávpi sáhtášii maid šaddat deaŧalaš vuovdinkanálan sámi dáiddáriidda ja duojáriidda. Dál illudan rahpamii ja jáhkán dán šaddat dakkár vuovdinbáikin mii olbmuid geasuha.
Gávppit mat promoterejit buriid buktagiid sámi birrasiin leat hui deaŧalaččat daidda geat háliidit dáidagis ja duojis birgejumi oažžut, loahpaha Sámediggeráđi Muotka.Sámediggi bidjá jahkásaččat doarjjaruđaid sámi kulturealáhusaid aktevrraide. Ohcamiiguin sáhttet doarjaga oažžut ovdánahttinprošeavttaide mat buktet árvolassáneapmi. Doarjja Nordnorsk Kunstmuseumii lea juolluduvvon Doarjja kreatiivvalaš ealáhusaid ortnegis.
Jus lea gažaldagat dahje áiggošit jearahallat, váldde oktavuođa Sámediggeráđi Silje Karine Muotkain, mob. +47 984 87 576, silje.karine.muotka@samediggi.no