Sámediggi lea dán jagi juolludan 250.000,- ruvnnu Kárášjoga giellaguovddášálggaheapmái prošeavtta “Giella ja identitehta” bokte. Sámediggi juolluda sámi giellaguovddážiidda álggahandoarjagiid golmma jagi badjel.
Ulbmil “Giella ja identitehta” prošeavttain lea movttiidahttit mánáid, nuoraid ja sin váhnemiid sámegiela atnit, oahppat ja dikšut. Jurdda prošeavttain lea lágidit “Kick off” eahkediid gos logaldallit ja giellaberošteaddjit čuvgejit dili. Deaivvademiin galget hutkat ja rávvet man láhkai ovdánahttit giela. Dát prošeakta lea maid vuođđun ásahit sierra giellaguovddáža Kárášjohkii.
- Giella lea dehálaš kultuvrii ja identitehtii. Sámi giellaguovddážat leat nu mávssolaš ovttasbargoguoimmit sámegielaid ovdánahttimis ja seailluheamis. Dasa lassin lea buorre go Sis-Finnmárkku gielddat vuoruhit gielladoaimmaid. Mii maid fertet dáppe ovddidit giela, vaikko sámegiella lea eanetlogugiellan, dadjá sámediggepresideantta Aili Keskitalo.
Sámediggi doarju maid dáid giellaprošeavttaid Kárášjoga gielddas giellaguovddáža ásaheami oktavuođas:
Báikenamat ja kulturmuittut: 237.000 ruvnnu
Ulbmil prošeavttain lea boktit mánáid ja nuoraid beroštumi ruovttugieldda báikenamaide ja kulturmuittuide ja dan bokte oahppat olbmuid ja sogaid gullevašvuođa dihto báikkiide.
Nuoraidlávdi: 234.000 ruvnnu
Nuorat galget sámegielain čilget ja govvidit nuoraid dili ja sin jurdagiid sohkabealrollaid, seksualitehta, givssideami ja veahkaválddi hárrái. Sii galget ráhkadit lávdečájálmasa mas lea rollaneaktin sámegillii oktan luohte- ja musihkkačehpiiguin ja eará lávdedáiddáriiguin.
Hállanhállu: 237.000 ruvnnu
Ulbmil prošeavttain lea nanusmahttit sámegielbirrasa sidjiide geat leat oahpahallame sámegiela, dahje háliidit dikšut sámegielaset. Iešguđetge lágan deaivvademiin, fáddáeahkediin, mátkkiin, ja buđaldemiin ja bargguin besset oasseváldit sámástit.
Čállinverdde: 203.000 ruvnnu
Vuorrasiid gaskkas vásihuvvo dávjá ahte oktagaslaš vuoigatvuohta oažžut sámegillii ja kultuvrii heivehuvvon bálvalusaid ii váldo vuhtii. Prošeavtta ulbmil lea veahkehit vuorasolbmuid lohkat ja čállit, ja veahkehit bálvalusaiguin mat leat digitaliserejuvvon.
Jearahallama addá sámediggepresideanta Aili Keskitalo, tlf. 971 29 30