Ovttasbargu lea Sámedikki prošeavtta SáMOS - Sámi mánát ođđa searvelanjain ja Sámi allaskuvlla gaskka. Prošeavtta ulbmiliid ektui galgá sámi filosofiija leat vuođđun sámi mánáidgárddiid sisdollui, gos earret eará sámi árvvut, luonddufilosofiija, giella, kultuvra, jođiheapmi ja árbedieđut guddet pedagogalaš barggu ja sisdoalu.
Sámediggi ja Sámi allaskuvla galgaba šiehtadusa vuođul ovttas ovddidit sámi mánaidgárddiid gelbbolašvuođa, earret eará čielggadit dutkandárbbuid ja ovttasbargat rekrutteremis, seminára lágidemiin ja rámmaplána doibmiibidjamiin prošeavtta vuođul.
– Mánáidgárdi lea deaŧalaš sámi institušuvdna, ja ovttas Sámi allaskuvllain galgat Sámedikki bealis vástidit daidda dárbbuide mat leat otnáš sámi mánáidgárddiin. Sámi mánát leat min boahtteáigi, dan dihte lea deaŧalaš ahte Sámediggi vuoruha ja doarju ovdánahttinbargguid ja oahpahusa sámi árvvuid vuođul, dadjá sámediggeráđđi Mikkel Eskil Mikkelsen.
– Sámi allaskuvlii lea deaŧalaš nannet oahpahusaid ja dutkamiid sámi servodatdiliid, máhtuid ja árvvuid ektui, ja dákkár oktasašbargu ovttas Sámedikkiin loktii vejolašvuođaid ja addá liige geahčastaga ja lahkoneami min mánáidgárdeoahpahussii ja dutkamii, dadjá Sámi allaskuvla rektor Gunvor Guttorm.
Šiehtadus lea dahkkon ođđajagimánu 1. beaivvi 2019 rájes juovlamánu 31. beaivvi 2022 rádjái.
Šiehtadusa sisdoallu:
- Gelbbolašvuođalokten: Čalmmustahttit resursadárbbuid ja bargat sámi mánáidgárddiid gelbbolašvuođaloktemiin.
- Ovddidit dutkama: Initieret vejolašvuođaid lasi dutkamiidda mat ovddidit sámi mánáidgárddiid dutkandárbbuid.
- Ovddidit sámi mánáidgárdeoahpaheaddjeoahpu: Fievrredit prošeavtta rávvagiid ja bohtosiid boahtteáiggi sámi mánáidgárdefálaldagaide buorrin.
- Seminára- ja konferánsalágideapmi: Veahkkálaga lágidit konferánssaid ja semináraid nu guhkás go lea vejolaš.
Eanet dieđuid šiehtadusa ja prošeavtta SáMOS birra addet:
Mikkel Eskil Mikkelsen, sámediggeráđi lahttu, +47 917 42 161, Gunvor Guttorm, Sámi allaskuvlla rektor, +47 904 70 793, Ol-Johán Sikku, SáMOS - Sámi mánát ođđa searvelanjain prošeaktajođiheaddji, +47 902 23 804