Sámediggi ja Sámi dáiddárráđđi leat šiehttan 2019 dáiddáršiehtadusa. Šiehtadusa rámma lea 8 350 000 ruvnno, ja sisttisdoallá doaibmadoarjaga Sámi dáiddárráđđai ja dasa gullevaš guđa dáiddársearvái, stipeandadoarjaga sámi dáiddáriidda, dáiddárfoandda ja čájáhusbuhtadusa. Goappešat bealit leaba ovttaoaivilis vuoruhit ja nannet doarjaga dáiddárstipeanddaide ja doaibmadoarjaga dáiddárráđđái ja dáiddárservviide.
Henrik Olsen (Foto: Kenneth Hætta)
– Dáiddáršiehtadus addá dáiddáriidda vejolašvuođa váikkuhit sámi dáidaga ovdáneami, ja addit sámi dáidagii ja dáiddáriidda buriid rámmaeavttuid, dadjá Olsen.
Sámi dáiddárráđi šiehtadallanlávdegotti jođiheaddji Synnøve Persen muitala ahte Dáiddárráđi gáibádus Sámediggái 2019 Dáiddáršiehtadussii lei 6,7 milj. ruvnno stuorát go maid Sámediggi loahpalaččat nagodii juolludit.
– Dát muitala ahte sámi dáiddáriin leat oalle aktiivvalaš plánat mo ovddidit sámi dáidaga iešguđetge osiid, maid leat váttis ruhtadit go sámi dáidaga ruhtadeapmi lea čadnon Sámediggái. Mii leat fállan Sámediggái veahki go galget ánuhit bušeahtaid loktet, vai sámi dáidda beasašii lieđđut ja báitit dainna fámuin mat leat dan dovdomearkkat, ja mii vuordit ahte juo 2020-bušeahtat leat sakka lassánan, dadjá Synnøve Persen.
Jus áiggut jearahallama, de váldde oktavuođa sámediggeráđiin Henrik Olseniin, +47 907 75 219.