Duodji lea kulturguoddi ealáhus mas lea stuorra mearkkašupmi sámi gillii, kultuvrii ja ealáhusovddideapmái. Danne lea deaŧalaš sihkkarastit ahte duodji birge sihke kultuvrralaččat ja ealáhussan. Duojis lea stuorra mearkkašupmi sámi identitehtii.
– Sámedikkis lea mihttomearrin ovddidit duoji ealáhussan, nu ahte eambbogat sáhttet viežžat das birgejumi, dadjá sámediggeráđđi Inger Eline Eriksen Fjellgren.
Fjellgren čilge ahte iežas duddjon duoji eanet vuovdin stuorát márkanii lea guovddážis Sámedikki áŋgiruššamis. Dát mearkkaša maiddái dan ahte profešonalitehta, sisaboađu ja gánnáhahttivuođa ealáhusas ferte buoridit.
Ferte árvvoštallat eará doarjjaortnegiid
Sámediggi lea 2017:s várren duodjái oktiibuot 14 miljon ru. Oktage eará aktevra ii sáhte čujuhit dán lágan áŋgiruššamii duojis. 2016:s lei Sámedikki áŋgiruššan duojis 46 % ruđain mat Sámedikkis ledje ealáhusaid váras. Ruđain mat várrejuvvojedje 2016:s geavahuvvui badjel guokte miljon ruvnnu doaibmadoarjjan.
Vaikko duojárat leat ožžon doaibmadoarjaga, de ii leat dat dattetge buvttihan stuorát gávpejođu. Duodjeealáhusa logut čájehit ahte gaskamearálaš duojár lea sorjavaš doaibmadoarjagis vai doaimma sáhttá jođihit marginála badjelbáhcagiin.
– Go váikkuhangaskaoapmeortnet Sámedikkis ii doaimma, de lea mis politihkkariin ovddasvástádus heivehit dahje rievdadit doarjjaortnega vai juksat dan beaktilvuođa maid háliidat. Mii oaivvildat ahte eará doarjjaortnegat leat eanet ulbmillaččat duodjeealáhusa nannemii, nugo ovdamearkka dihtii bargostipeanda, dadjá sámediggeráđđi Inger Eline Eriksen Fjellgren.
– Mohtorjohtalusláhka ferte rievdaduvvot
Eanet duojárat leat sorjavaččat luonddu ráhkadanávdnasiid geavaheamis. Hástalussan lea dat go sis ii leat lága bokte vuoigatvuohta vuodjit meahcit viežžamin ráhkadanávdnasiid, muhto leat sorjavaččat sierra lobi oažžumis mohtorjohtalusgildosis. Dát geavahus buktá lassi barggu duojáriidda, iige dat dávis sámi jurddašanmállii.
– Čielggas lea ahte berrešii leat vuoigatvuohta vuodjit meahcis ealáhusoktavuođas. Mohtorjohtaluslága ferte rievdadit vai duojárat šattašedje dássálaga eará ealáhusbargiiguin geain lea vuoigatvuohta vuodjit, dadjá Fjellgren loahpas.
Gulahallan: Sámediggeráđđi Inger Eline Eriksen Fjellgren, tel. 414 58 703