Sámediggeráđđi lea juolludan 150 000 ruvnno doarjaga SápmiAgri-prošektii, mii lea áŋgiruššan eanadoalu ovddas Porsáŋggus, Guovdageainnus, Kárášjogas, Deanus ja Unjárggas. Prošeakta lea ovttasbargu gaskkal Sámedikki, dán viđá suohkana, Finnmárkku fylkkamánni, fylkkagieldda eanadoalloossodaga ja Norgga innovašuvnna. Prošeakta bistá 3 jagi, ja almmolaš rahpanbeaivi lea mánnodaga cuoŋománu 3.b.2017, dalle doallá maid stivrenjoavku vuosttaš čoahkkima Sámedikkis Kárášjogas.
– Sámediggi fuolastuvvá go doaluid lohku njiedjá dáin suohkaniin, juoga maid mii leat oaidnán lea dáhpáhuvvan juo ollu jagiid. Mun doaivvun mii sáhttit goazadit dán njiedjama, ja mun sávan eanet nuorat háliidit eallit eanadoaluin boahtteáiggis, lohká sámediggeráđđi Inger Eline Eriksen, gii maid searvá otná čoahkkimii.
Stivrenjoavkkus leat Sámedikki, suohkaniid, fylkkamánni ja fylkkasuohkana ovddasteaddjit, ja vel eanadoalloorganisašuvnnain.
Áigot movttiidahttit nuorra eanadolliid
Sámediggi doarjjui prošeavtta «Jordbruk og vekst i Ávjovárri (Eanadoallu ja ovdáneapmi Ávjováris)», mii loahpahuvvui ođđajagimánu 2017, buriid bohtosiiguin. Loahpparaporta muitala earret eará ahte prošeakta mielddisbuvttii eanet rekruterema, gelbbolašvuođaloktema ja stuoridemiid doallodáluin. SápmiAgri áŋgiruššan lea viidásetfievrrideapmi dás, ja sámediggeráđđi Inger Eline Eriksen jáhkká ahte prošeakta buktá buori ovdáneami fylkka eanadollui.
– Dat ahte eanet suohkanat ja eará aktevrrat ovttasbarget nannet eanadoalu, mielddisbuktá ahte mii sáhttit movttiidahttit eambbogiid álgit dahje viidásetovdánahttit doaimmaid. Olbmuide geat háliidit dáinna bargat, lea hui dehálaš ahte sis lea fierpmádat seammaláganiiguin, lohká Eriksen.
2017:s lea Sámediggi láhčán vejolašvuođa ruhtadit visttiid biergobuvttadanvuovssáid várás ja mielkerobohtaide miehtá doaibmaguovllu, ja dasa lassin juolludit doarjaga sihke sávza- ja gáicanávehiidda.
– Mun lean ilus go Sámediggi dál vuoruha eanadoalu, lohká sámediggeráđđi Inger Eline Eriksen.
Váldde oktavuođa jearahallamiid várás sámediggeráđiin Inger Eline Eriksen, telefonnummár 414 58 703
Govva: SápmiAgri vuosttaš stivračoahkkin - ovttasbargoprošeakta Poršánggu, Guovdageainnu, Kárášjoga, Deanu ja Unjárggá gielddaid gaskka man ulbmil lea ovddidit eanadoalu dáin gielddain.
