Sámedikki dievasčoahkkin lea mearridan doarjjaortnega mas mihttun lea nannet sámi areála- ja resursavuoigatvuođaid. Dievasčoahkkin lea dán ortnegii várren 750.000 ruvnno.
Bohte ovcci ohcamuša áigemearrái, mii lei cuoŋománu 1. beaivvi. Ráđđi meannudii ohcamušaid geassemánu 28. beaivvi Kárášjogas. Njeallje ohcci ožžo doarjaga.
Deanu ja biras mearraluossabivdosearvi (Tana og Omegn Sjølaksefiskeforening) organisere bivdiid Deanuvuona, Várjjatvuona, Lágesvuona, Fálesnuori ja Álttávuona birra.
Sámediggepresideanta Vibeke Larsen lohká dehálažžan čielggadit mearraluossabivdiid riektedili ja danne juolluda sámediggeráđđi 200.000 ruvnno Deanu ja biras mearraluossabivdosearvái.
Joavkoáššečuoččaldahttin stáhta vuostá
Larsen muitala ahte sámediggeráđđi maid juolluda 300.000 ruvnno Deanučázádaga luossabreavaeaiggádiid searvái ja Deanučázádaga luossabivdosearvái vai besset čuoččaldahttit ášši fámohuhttin dihte šiehtadusa Norgga ja Suoma gaskkas Deanučážádaga bivdima birra.
– Šiehtadus Norgga ja Suoma gaskkas láivuda báikkálaš álbmoga bivdinvuoigatvuođa, mas lea lágalaš suodjaleapmi vuođđolága ja álbmotrievtti mielde. Báikkálaš fierbmebivdit fertejit unnidit iežaset árbevirolaš bivddu nu olu ahte árbevirolaš bivdu lea nohkagoahtime stáhta reguleremiid dihte, lohká sámediggepresideanta Vibeke Larsen.
Nannet boazosápmelaččaid gelbbolašvuođa
Sámediggeráđđi juolluda 150.000 ruvnno Romssa boazosápmelaččaid fylkkasearvái nannen dihte boazosápmelaččaid gelbbolašvuođa almmolaš rievttis ja areálahálddašeamis, vai sii buorebut sáhttet áimmahuššat iežaset vuoigatvuođaid ja geatnegasvuođaid, ovdamearkka dihte plánenbarggus.
Prošeavttas lea maid mihttun nannet suohkaniid gelbbolašvuođa ja diđolašvuođa boazodoalu areálageavaheami birra, erenoamážit dan boazodoalu birra mii lea Romssa fylkkas.
Čielggadit meahcástanvuoigatvuođaid
Mearrasámi árbediehtu dáhttu čielggadit sámi vuoigatvuođaid Davvinjárgga gielddas, erenoamážit Strándá-guovllus. Ulbmil lea nannet vuoigatvuođaid bivdimii, oaggumii, muorječoaggimii ja eará meahcástallamii Davvinjárgga gielddas.
Ráđđi juolluda 100.000 ruvnno čielggadeapmái.
– Sámediggái lea dehálaš nannet mearrasámi vuoigatvuođaid, nu ahte árbevirolaš eanangeavaheapmi sihkarastojuvvo dakko bokte ahte dat suodjaluvvojit billisteami vuostá, lohká Larsen.
Eanet dieđut: Sámediggepresideanta Vibeke Larsen, 941 30 116