Ruoŧa Sámedikki presideanta Per-Olof Nutti, Suoma Sámedikki presideanta Tiina Sanila-Aikio, IsumaTV kollektivva filbmadahkki Uyarak Tulugarjuk, álgoálbmot kuráhtor Candice Hopkins, Norgga Sámedikki presideanta Aili Keskitalo ja sámediggeráđđi Henrik Olsen (govven: Silja Somby/Sámediggi)
Guovddášovttasbargi šaddá Toronto dáiddabiennála, mas álgoálbmot kuráhtor Candice Hopkins ovttasbargá OCA:in Susan Schuppli prošeavttain “Learning from Ice” - oahppat jieŋas. Ulbmilin lea čalmmustahttit jieŋa muitalusaid dálkkádatrievdama oktavuođas ja maiddái vuoigatvuođa bissut galmmasin. Prošeakta fátmmasta maid sámi diehtaga ja dáidaga. Dát ovttasbargu lea áigodagas 2020-2021.
“Dáidda ja vuostálasvuohta” leat dáiddadiŋgojumit áigodagas 2020-2023, ovttasbarggus KORO:in - Norgga almmolašvuođa dáiddalihtuin. Vuolggasadji lea Duohtavuođa- ja seanadankommišuvnna bargu ja kolonialismma váikkuhusaid čalmmustahttin sihke ovddeš ja dálá áiggis. Ovttasbargu maid galgá buktit ovdán dáidaga dehálaš gaskkustanfámu iešguđege gažaldagaide, čuolmmaide ja vuostálašvuođaide maid duohtavuođa- ja seanadankommišuvdna boahtá ovdanbuktit servodahkii. KORO lea dehálaš ovttasbargoguoibmi dan olis go sii maid leat vuođđuduvvon vuostálasvuođaid boađusin 70-logus.
“Sápmi Brasilas” lea oassin São Paulo dáiddamusea prográmmas Brasilas, mii bidjá álgoálbmot dáidaga guovddážii 2021:s. OCA áigu ohcalit ovttasbarggu sámi kuráhtoriiguin ja KODE dáiddamuseain Bergenis. Prográmmas Sao Paulos, Brasilas galget leat earret eará konferánssat, almmuheamit, čájáhusat ja bargobájit.
Sámediggepresideanta Aili Keskitalo oahppalattai Venezia dáiddabiennála gieskat, ja searvvai čájáhusa A Greater Miracle of Perception rahpamii Alvar Aalto-paviljongas, mas earret eará sámi dáiddárat Suvi West ja Outi Pieski leigga mielde, oassin Miracle Workers-dáiddakollektiivvas.
– Mis lea juoga fállat máilbmái, sámi dáiddárat geat áidnalunddot jienaiguin gaskkustit eará duohtavuođaperspektiivvaid. Máilbmi dárbbaša sámi dáidaga, dadjá sámediggepresideanta.
Jearahallama addá presideanta Aili Keskitalo, tlf. +47 971 29 305
OCA gulahallanolmmoš: Eirin Torgersen, + 47 93 48 07 16, www.oca.no
Oassi dáiddára Outi Pieski installašuvnnas "Ovdavázzit - Forewalkers", mii dál čájehuvvo Venezia biennálas (govven: Åse M.P. Pulk/Sámediggi)