Giellaguovddáš galgá ásahuvvot 2017 čavčča mielde, ja doarjja galgá adnot giellakurssaide ja ásahit sámegielarenaid.
– Sámediggeráđđi lea ilus go ásahuvvo giellaguovddáš oaivegávpogis. Dát lea erenoamáš dehálaš danne go eai leat ásahuvvon sámi giellaguovddážat Lulli-Norggas ja danne go leat unnán eará nanu giellabirrasat Oslo-guovllus, gos orrot olu sápmelaččat, dadjá várrepresideanta Lars Filip Paulsen.
Lea čájehuvvon ahte sámi giellaguovddážiin lea dehálaš rolla sámegielaid ovddideamis. Go sámi giellaguovddáš ásahuvvo Osloi, de sáhttet sámegielat nannejuvvot ja ovddiduvvot stuorát guovllus.
– Háliidan sávvat Sámi vissui ja Oslo suohkanii lihkku giellaguovddášásahemiin, ja ávžžuhan gávpoga ássiid ja maiddái earáid viššalit searvat doaimmaide maid giellaguovddáš bidjá johtui, dadjá Paulsen.
Eanet dieđut: Sámedikki várrepresideanta Lars Filip Paulsen, mob. +47 916 18 561