Dasa lassin ovdanbuktojuvvojit dán almmuheamis maiddái sámi filmmat ja sámediggeválggaid treanddat.
Sámi statistihka fágalaš analysajoavku lea sorjjasmeahttun fágajoavku mii redigere ja almmuha sámi statistihka mearkkašumiiguin juohke jagi. Dál lea áigečála man namma lea Sámi logut muitalit almmuhuvvon 11 jagi ja dát publikašuvdna lea deaŧalaš sidjiide geat barget politihka ovddidemiin ja áššemeannudemiin sámi diliid birra.
– Vaikko analysajoavku lea sorjjasmeahttun de oažžut mii fágalaš rávvagiid ja dat gulahallá Sámedikkiin. Lea lunddolaš ja deaŧalaš ahte mii gulahallat dainna ásahusain mii dovdá sámi diliid buot buoremusat, danne go dat leat Sámi logut muitalit sisdoalu buot deaŧaleamos geavaheaddjit, dadjá analysajoavkku jođiheaddji stáhtadiehtti Kevin Johansen.
Almmuheamis geigejuvvo Sámi logut muitalit 11 Sámedikki politihkalaš jođiheddjiide ovdal go sierra artihkkaliid čállit ovdan bukten gávdnosiid ja buktet doaibmabidjoevttohusaid sierra surggiid birra.
Dán jagi lea maiddái Stuorradikki gielda- ja hálddašanlávdegoddi mielde almmuhandilálašvuođas. Analysajoavkku jođiheaddji Kevin Johansena mielas, lea dat hui buorre.
– Dál lea mis vejolašvuohta ovdan buktit maiddái gávdnosiid daidda politihkkáriidda geat dahket mearrádusaid Stuorradikkis ja dasa mii illudat.
Eanet dieđuid addiba: Sámi statistihka fágalaš analysajoavkku čálli Yngve Johansen, mob. 915 65 966, dahje ossodatdirektevra Sámedikkis, Jan Roger Østby, mob. 481 44 696