SáMOS pilohtamánáidgárddiid ortnega ulbmil lea sámáidahttit mánáidgárddi ja dakko bokte addit vuođu Sámedikki SáMOS prošektii, ovddidan dihte sámi mánáidgárdepedagogihka ja bargovuogi, sámi vuođđojurdagiid mielde.
SáMOS-prošeavtta áigumuš lea ovddidit pedagogalaš barggu gos vuolggasadjin leat sámi árvvut, luonddumáhttu, giella, kultuvra, jođiheapmi ja árbedieđut. Pilohtamánáidgárdebargu čađahuvvo ovttas Sámi allaskuvlla dutkiiguin.
Álgovuorus biddjojit johtui njeallje pilohtamánáidgárddi ja dan maŋŋá lasihuvvojit eanet mánáidgárddit. Ohcanáigi lea golggotmánu 15. beaivvi.
– Dál SáMOS-prošeakta lea ollen dan muddui ahte konkrehtalaččat galgá dutkat ja ovddidit sámi bargovugiid ovttas sámi mánáidgárddiiguin. Šaddá miellagiddevaš čuovvut sámi pedagogalaš ovdáneami ovddasguvlui, dadjá sámediggeráđđi Mikkel Eskil Mikkelsen.
Jearahallama addá sámediggeráđđi Mikkel Eskil Mikkelsen, tel. +47 917 42 161