Su. 7,5 miljon ruvnnu lea juolluduvvon iešguđet ealáhusprošeavttaide. Sámediggeráđđi Mariann Wollmann Magga muitala ahte guolásteamis lea positiiva ovdáneapmi ja ahte bohtet ollu ohcamat, sihke doarjagiid oktavuođas bivdofanasruhtadeapmái ja gádde-/vuostáiváldirusttegiid ásaheapmái ja ovddideapmái.
– Sámediggi lea deaŧalaš aktevra váikkuhangaskaomiid geavaheami bokte sihkkarastimii ja ovddideapmái geasuheaddji ja gánnáhahtti guolásteami sámi riddo- ja vuotnaguovlluin, dadjá Magga.
Láhčá gáddenvejolašvuođaide
Magga muitala ahte eat erenoamážit juolluduvvon stuorra supmit guollerusttegiidda gáttis maŋimus áigodagas, olles vihtta rusttega leat ožžon oktiibuot 1.666.000 ru. Daidda gullet rusttegat Girenjárggas, Njeareveajis, Skártavágis, Šuoššjogas ja Nuortavágis.
– Lea deaŧalaš láhčit dasa ahte uhcimus fatnasiin lea vejolašvuohta gáddet varas guliid ja lea hui deaŧalaš viidáseappot ovddidit ja nannet báikkálaš vuostáiváldinstruktuvrra sihkkarastin dihtii guolástusdoaimmat jotkojuvvojit báikkálaš riddo- ja vuotnaservodagain. Gáddenvejolašvuohta báikkálaččat uhcimus fatnasiidda lea eaktun dasa ahte bisuhit ássama ja barggolašvuođa mearrasámi guovlluin, dadjá Magga.
Mátkeealáhus deaŧalaš áŋgiruššan
Sámediggeráđđi lea juolludan badjelaš 1,3 miljon ruvnnu máŋga mátkeealáhusfitnodahkii mat galget geavahuvvot investeremiidda ja ovddidandoaibmabijuide. Sihke Arctic Nuvsvåg AS Láhpis, Tufjord Molta & Utleie AS Muosáin, Vesterelvjenta AS, Koppangen brygger AS Ivgus, ja Aernie AS Ránus leat ožžon doarjaga.
– Sámi mátkeealáhussii lea hui deaŧalaš ahte mis leat máŋggabealat fálaldagat. Mátkeealáhus lea Sámediggái deaŧalaš áŋgiruššan, dadjá Magga.
Tråante-lávvu menestuvai
Sámediggeráđđi lea maid dorjon Riikasearvvi Sámiid Duodji ja Duojáriid Ealáhussearvvi 150.000 ruvnnuin goabbái ge, nu ahte duodji lei fidnemis ávvovahkus Tråante 2017. Magga dadjá ahte ledje golbma rámálmas márkanbeaivvi stuorra lávus Troandima gávpešiljus, gosa 32 čájeheaddji ledje buktán buoremus bohccobierggu, duoji ja sámi designa iešguđet guovlluin Sámis.
– Vásáhussan lei ahte lávvu livččii sáhttán leat das guovtte geardde guhkit áiggi ja guovtte geardde stuorát. Jearru lei issoras stuoris, dadjá Magga duhtavaččat.
Dorjon máŋga kulturprošeavtta
Sámediggeráđđi lea maid juolludan doarjaga 26 kulturprošektii, mat oktiibuot leat ožžon lagabui 1,5 miljon ruvnnu. Dan oktavuođas Magga váldá ovdan golbma nissona geat leat ožžon doarjaga.
Bente Haarstad lea ožžon 74.000 ruvnnu čájáhussii govvadokumentárii lullisámi boazodoalu birra. Simone Grøtte Pedersen lea ožžon 150.000 ruvnnu Glemt nammasaš dánsunčájáhussii, mii lea Davvi-Norgga soahtehistorjá ja mii čájehuvvo vuosttaš geardde Festspillene i Nord-Norge doaluin. Maret Anne Sara lea ožžon 149.900 ruvnnu prošektii Pile o´Sápmi, mii lea dáiddabuvttus mii ráhkaduvvui vuostecealkámuššan ja govastahkan stáhta bággonjuovvamiidda Finnmárkkus.
– Bente Haarstad dahká jáhkkemeahttun buori barggu duođaštemiin lullisámi boazodoallokultuvrra. Simone Grøtte Pedersen čalmmustahttá iežas eanet ja eanet juohke dánsunčájáhusain. Maret Anne Sara geavaha dáidaga dasa ahte čalmmustahttit boazodoalu dili, ja gievrras politihkalaš jietnan maiddái, dadjá sámediggeráđđi Mariann Wollmann Magga.
Geahča guđe prošeavttat leat ožžon juolluduvvot doarjaga áigodagas 10.02.17- 04.05.17:
Jearahallama várás, váldde oktavuođa sámediggeráđiin Mariann Wollmann Magga, mob. 977 02 350.