Surgadis dáhpáhusat go bohccot leat nu ollu vuddjon Norlándda- ruovdemáđiijas diibmá lea boktán riikkaidgaskasaččat fuomášumi. Váile vahkus siste vuddjojedje skábmamánus diibmá 128 bohcco togii Jillen-Njarke orohagas. Bane NOR dieđuid mielde lei teknihkalaš sivva manne dieđut boazoeaiggádiin eai ollen vuosttaš dáhpáhusa oktavuođas.
Sámediggeráđđi árvvoštalai vuddjomiid ollislaččat eahpedohkálažžan ja bivddii jođánisčoahkkima ministariin. Čoahkkimis juovlamánu 1. b. lohpiduvvojedje dalán doaibmabijut ja ahte Sámediggi ja boazodoallit galge bovdejuvvot Nordlándda-ruovdemáđiija mielde ođđajagimánus.
Dán vahkus galgá johtalusministtar togamátkái Norlándda-ruovdemáđiijain, ja gaskavahku ođđajagimánu 24. b. son lea bovden sámedikki presideantta, ja Jillen-Njarke ja Sálttu orohagaid ovddasteddjiid ságastallat boahtteáiggi doaibmabijuid birra, movt hehttešii bohccuid vuddjomis.
– Mii giitit bovdejumi ovddas ja illudat togamátkái. Ovdagihtii leat mii earret eará fuomášuhttán departemeantta ahte gaskkain guhkkelis davvin leat maiddái váttisvuođat. Badjel 80 bohcco vuddjojedje Sáltoduoddaris juovlamánus diibmá. Danne ávžžuhat mii departemeantta bovdet maiddái Sálttu orohaga, vai sii ožžot vejolašvuohta muitalit ministarii sin hástalusaid birra, dadjá Sámedikki presideanta Aili Keskitalo.
Čoahkkin lea lahka Mosjøen stašuvnna. Čoahkkima maŋŋá galget oasseváldit geahčadeapmái eanemus uhkiduvvon guovlluide.
– Dasa lassin áiggun mun hupmat johtalusministariin togamátkkis vejolaš plánaid birra ja Norlándda-ruovdemáđiija ja Arctic Railway guhkideami birra ja dadjá Keskitalo loahpas.
Preassa lea maiddái bovdejuvvon searvat mátkái. Preassa mii háliida searvat sáhttá váldit oktavuođa Johtalusdepartemeantta gulahallanhovddain Susanne Moen Stephansen, mobil: 48032792.
Jus áiggut jearahallama, de váldde oktavuođa sámediggepresideanttain Aili Keskitalo, +47 971 29 305.
Prográmma gaskavahku ođđajagimánu 24. beaivvi:
13:16-16.42: Persovdnatogamátki Fuoskku-Mussere.
16:50-17.25: Čoahkkin Musseres dan birra go bohccot vuddjojit Johtalusministariin ja orohaga ovddasteddjiiguin ja Biebmobearráigeahčuin Restaurant Milanos, mii lea Mosjøen stasjon lahka.
17:30-18.30: Geahčadit guovllu gos bohccot vuddjojit, Mosjøen-Kvalfors/Trofors-Mosjøen gaskka.