Dán prošeavttas sáhttet muhtun nuorat geahččalit guokte jagi mo lea bargat doaluin. Áiggi mielde sáhttet oasseváldit váldit badjelasaset doalu. Geavatlaš bargui lassin čuovvula nuoraid bagadeaddji.
Sámediggi lea gieskat juolludan 300.000 ru doarjjan prošeavtta nuppi ja maŋimuš jahkái.
– Mu mielas lea deaŧalaš ahte nuorat ožžot vejolašvuohta bargat doaluin ovttas ásahuvvon boanddaiguin. Áiggi mielde sihkkarastá dát rekrutterema eanadollui, jáhkká sámediggeráđđi Inger Eline Eriksen.
Eanadolliid gaskamearálaš ahki Finnmárkkus lei 51,7 jagi 2014:s. Ealáhussii lea unnán rekrutteren. Suorggahahtti lea maiddái go doaluid lohku Finnmárkkus unnu - áigodagas 2005-2015 njiejai lohku 23 proseanttain, 421 doalus 324 dollui.
«Trainee eanadoalus»-prošeakta čađahuvvui ovddasmanni prošeaktan áigodagas 2011-2014, ja dalle ledje vihtta fitnodaga/doalu Finnmárkkus mielde, ja bohtosat ledje buorit. Sámediggi juolludii doarjaga prošektii 2015:s, ja prošeakta álggahuvvui fas čakčamánus 2015.
– Mun sávan sakka ahte šiehtadusbealit eanadoalus válddášedje trainee-ortnega bissovaš ortnegin eanadoallošiehtadusa siskkobealde, dadjá sámediggeráđđi Inger Eline Eriksen.
«Trainee eanadoalus» hálddaša Finnmárkku fylkkamánni.
Jus áiggut jearahallama, de váldde oktavuođa sámediggeráđiin Inger Eline Eriksen, tel. +47 414 58 703. Eará dieđuid addá seniorráđđeaddi John Osvald Grønmo, tel. 78 47 41 86