Áigodagas ođđajagimánu/guovvamánu áigu presideanta Aili Keskitalo galledit gielddaid sámegiela hálddašanguovllus ja daidda guoski fylkkagielddaid. Son áigu earret eará digaštallat guovttegielatdoarjagiid birra ja báikkálaš giellaguovddážiid birra.
- Sámi giellagielddain lea earenoamáš ovddasvástádus nannet ja ovddidit sámi giela, ja sihkkarastit ahte ássit ožžot devdojuvvot iežaset giellavuoigatvuođaid. Mu mielas lea dehálaš ahte lea buorre gulahallan dan birra ahte makkár hástalusat gielddain leat dán suorggis, ja galledan danin gielddaid duos dás, lohká presideanta Aili Keskitalo.
Presideanta Keskitalo geassá ovdan earret eará dan ahte Sámediggi háliida ahte báikkálaš giellaguovddážiid geavaheddjiin galgá leat eanet dadjamuš doppe ja dovdat lagasvuođa guovddážiidda.
- Midjiide lea dehálaš ahte giellaguovddážiid doaimmat leat dan mielde movt sámi álbmoga dárbbut leat, ja dalle lea dehálaš ahte báikkálaš sámi organisašuvnnat dahje institušuvnnat leat ovddastuvvon doaimmaid ovdáneamis maid guovddážat fállet.
Eará áššit leat gielddareforbma ja sámi beroštumit, man birra Sámediggi dagai čielggadeami 2015:s, ja mii meannuduvvui dievasčoahkkimis juovlamánus.
Gaskaboddosaš čoahkkinplána (sáhttá rievdat)
28.01 Unjárgga gielda
29.01 Finnmárkku fylkkagielda
03.02 Snoasa ja Raarvihke gielddat
04.02 Davvi-Trøndelága fylkkagielda
15.02 Divttasvuona suohkan
22.02 Guovdageainnu suohkan
30.03 Porsáŋggu gielda
Oktavuođa váldit:
Presideanta Aili Keskitalo, tlf. +47 971 29 305
Prográmma birra gažaldagat:
Fágajođiheaddji Niklas Labba, tlf. +47 78 47 40 87