Sámediggi lea juolludan 500.000 ruvnnu vuostáiváldinrusttega ásaheapmái Girenjárggas Álttá suohkanis ja 400.000 ruvnnu vuostáiváldinrusttega ásaheapmái Šuoššjogas Deanu gielddas.
Sámediggepresideanta Vibeke Larsen lea ilus go sáhttá leat mielde addimin doarjaga báikkálaš vuostáiváldinrusttegiid ásaheapmái Girenjárggas Álttá suohkanis ja Šuoššjogas Deanu gielddas.
- Uhcimus fatnasiid gáddenvejolašvuođat báikkálaččat lea eaktun dasa ahte bisuhit ássama ja barggolašvuođa mearrasámi guolástusservodagain, dadjá presideanta.
Nordvågen Fiskeriservice AS lea ožžon juolluduvvon 300.000 ruvnnu dakkár bálvalusfálaldaga huksemii Davvenjárgga gieldda guolásteddjiid várás go seaktunbuvrriid, bivddusrájuid ja eará huksehusat mat álkidahttet guolásteddjiid beaivválaš guolástusdoaimmaid.
- Sámediggi lea fievrridan čielga guolástuspolitihka mas garrasit deattuhuvvo riddo- ja vuotnaguolásteami vuoigatvuođat mearrasámi guovlluin. Ekonomalaš váikkuhangaskaomiid geavaheami bokte lea Sámediggi mielde nannemin ássama, árvoháhkama ja barggolašvuođa dáin guovlluin, dadjá sámediggepresideanta.
Oktiibuot lea juolluduvvon 1,5 miljon ruvnnu iešguđet ealáhusaide, ja kultursuorgái lea fas juolluduvvon 8,5 miljon ruvnnu iešguđet doaibmabijuide.
Sámediggi lea juolludan 50.000 ruvnnu Elin Kåvenii promoteret ja vuovdalit singela mainna Elin & The Woods galgá searvat Melodi Grand Prix 2017. Áigumuššan lea čalmmustahttit ja promoteret singela finála rádjai.
- Elin Kåven lea čájehan ahte son lea hui čeahpes artista mii olaha máilbmái ja illudahttá oaidnit ahte son dál searvá MGP:i. MGP oassálastin addá Kåvenii vejolašvuođa juksat sámi musihkain eanet guldaleddjiid, sihke riikka siste ja vejolaččat maiddái riikkaidgaskasaččat, jus Elin vuoitá Norgga MGP ja sáddejuvvo riikkaidgaskasaš finálii, dadjá sámediggepresideanta.
Sámediggi lea juolludan 150.000 ruvnnu Simone Grøtte Pedersenii buvttadandoarjjan dánsunčájáhussii “Glemt”. Čájáhus gieđahallá sámi ja davvinorgalaš álbmoga nuppi máilmmisoađis ja galgá váldit ovdan sihke lagas, rašes ja duohta dáhpáhusaid soađi áiggi maid sii muitalit njuolgga, geat vásihedje dan. Dat galgá gaskkustuvvot dánskalaš ja autentalaš jietnabáddemiiguin sihke sáme-, kvena- ja dárogillii. Álgočájáhus lea Festspillene i Nord-Norge oktavuođas dán jagi. Simone Grøtte Pedersen lea čeahpes dánsejeaddji gii lea ožžon ollu rámi iežas ovdalis dánsunčájáhusaid geažil, erenoamážit «Mannen som stoppet hurtigruta» nammasaš čájáhusa ovddas mii lea Johan Kåven birra.
- Čájáhus lea mielde dagaheamen ahte mis lea máŋggabealatvuohta kultur- ja dáiddaovdanbuktimiin, ja seammás dat lea mielde nannemin ja gáhttemin sámi dáládáidaga kulturovdanbuktima. Dat maiddái dahká sámi kultuvrra ja dáidaga oainnusin eanet gehččiide nu go sidjiide geat čuvvot Festspillene, loahpaha sámediggepresideanta Vibeke Larsen.
Gulahalli
Sámediggepresideanta Vibeke Larsen, tel. +47 94 13 01 16