Guolástusdirektevrra mearrádus guoská dan eanemus eari lasáhussii mii addojuvvui njukčamánu 31. b. dán jagi ja gusto vuossárgga miessemánu 8. b. rádjai. Guolástusdirektevrra ákkastallá dainna ahte meroštusat čájehit ahte várrejuvvon earri lea bivdojuvvon. Bivdu jotkojuvvo siskkobealde dan 16 tonna earrelasáhusa, mii lea dáhkiduvvon.
Sámdiggeráđđi Per Mathis Oskal ii doarjjo mearrádusa.
– Sámediggi bivdá dál Guolástusdirektevrra geassit ruovttoluotta iežas bissehandieđáhusa mii čuohcá mearrasámi guollebivdui, dadjá Oskal.
Mearrasámi vuotnaguolásteaddji olgguštuvvojit
Sámdiggi bivddii árat dán jagi Guolástusdirektevrra lasihit lasseeari 16 tonnas 26 tonnii vai mearrasámi guovlluid guolásteddjiid dienas buorrána. Guolástusdirektevra čuovvulii Sámedikki ávžžuhusa, muhto lasáhus addojuvvo de eanemus lasseeriin, mii čuovvu dan prinsihpa ahte sii geat leat ovddimusat, besset bivdit.
Go guolli boahtá riddo- ja vuotnaguovlluide iešguđet áiggiid, de lea eanemus lasseearri ávkin sidjiide geat bivdet doppe gosa guolli boahtá ovddimusat. Vuonaide boahtá guolli maŋŋit, mii mearkkaša ahte vuotnabivdit eai beasa bivdit lasseearis.
– Dat ii leat vuoiggalaš juogadeapmi. Ii ge Riddoeari mudden galggašii leat ná. Mii eat sáhte doarjut dákkár bonjujuogadeami, dadjá Oskal.
Ráđđelahttu lasiha ahte ii ge lean Stuorradikki dáhttu ahte dát earri galggai juogaduvvon ná botnjut go sii mearridedje várret 3.000 tonna mearrasámi guovllu guolásteddjiide.
Jearahallama várás, váldde oktavuođa sámediggeráđiin Per Mathis Oskal, telefovdna 977 77 552.