Go 2012 stáhtabušeahtta biddjojuvvui ovdan golggotmánus 2011, de čielggai ahte Raavrevijhke tjielte Davvi-Trøndelagas ii ožžon ruđaid beassat mielde sámegiela hálddašanguvlui. Miessemánu 15. b. biddjojuvvui reviderejuvvon bušeahtta ovdan ja vuot ii vuoruhuvvon Raavrevijhke.
- Sámediggi lea sakka beahtahallan go ahte Raavrevijhke tjielte Davvi-Trøndelagas ii dál ge beasa fárrui sámegiela hálddašanguvlui, erenoamážit go Ráđđehus lea cealkán ahte sii čalmmustuhttet sámi giela ja kultuvrra, cealká sámediggeráđđi Ellinor Marita Jåma.
Raavrevijhke tjielte lea máŋga jagi lasihan bálvalusfálaldaga sámi gielas ja kultuvrras. Okta dain doaibmabijuin maid gielda mearridii ovttajienalaččat, lei ahte sii háliidedje fárrui sámegiela hálddašanguvlui.
- Stáhtaráđđi Rigmor Åserud dadjá ieš preassadieđáhusas ahte lullisámegiella lea rašis giella. Buorre doaibmabidjun nannet ja gáhttet giela livččii suovvat Raavrevijhke fárrui hálddašanguvlui. Fiinna sániin ii leat árvu nu guhká go dat ii váikkut bušehttii. Dál sáhttit dušše sávvat ahte sánit biddjojuvvojit doaibmat ja ahte ruđat juolluduvvojit Raavrevijhkii 2013 stáhtabušeahtas, cealká ráđđelahttu Jåma loahpas.
Gulahalli:
Ráđđelahttu Ellinor Marita Jåma, tlf. 916 13 460