Bargosadji lea muhtun Sámedikki kánturbáikkiin gos lea guoros sadji. Dál leat mis guoros sajit Kárášjogas, Guovdageainnus, Gáivuonas, Unjárggas, Skániin, Snoasas ja Divttasvuonas.
Barggut
Virggi váldobargu lea čuovvulit Sámedikki bargguid mat gusket etihkalaš njuolggadusaide sámi dearvvašvuođadutkamis ja muđui barggut dearvvašvuođadutkan suorggis, earret eará veahkehit ásahit dutkanetihkalaš ja olgguldas áššedovdi lávdegotti sámi dearvvašvuođadutkamii.
Virgái gullá maiddái Sámedikki dearvvašvuođa politihkkaovddideapmi ja –čuovvuleapmi. Virgái sáhttet biddjot eará barggut Sámedikki doaimmas.
Gelbbolašvuohta
Virgái gáibiduvvo alit allaskuvlla/universitehta oahppu dearvvašvuođafága/- politihkas dahje eará guoskevaš servvodatfága oahppu. Bargovásáhus dearvvašvuođaásahusain ja/dahje almmolaš hálddašeamis/ovddideamis dearvvašpolitihka/-dearvvašvuođafágas deattuhuvvo.
Muđui deattuhuvvo:
- Sámegielgelbbolašvuohta
- Máhttu sámi servodatdiliid birra ja erenomážit máhttu dearvvašvuođadutkan fágasuorggis
- Buorit gulahallan- ja ovttasbargodáiddut
- Buorre njálmmálaš ja čálalaš ovdanbuktindáidu
- Dáidu bargat iešheanalaččat ja ulbmillaččat
- Veahkkáivuohta
- Persovnnalaš dohkálašvuohta
Bálká- ja bargoeavttut
Virgi bálkáhuvvo Stáhta regulatiivva mielde virgekodas 1434 ráđđeaddi dahje 1364 seniorráđđeaddi, ovdalis vásáhusaid ja gelbbolašvuođa vuođul.
- Bálkkás gessojuvvo 2 % Stáhta penšuvdnakássii
- Buorit loatna- ja penšunortnegat Stáhta penšunkássas
- Máškidis bargoáigi ja buorit čálgoortnegat
- Buorre bargobiras mas don leat okta váikkuheddjiin
Sámedikki hálddahus galgá nu bures go vejolaš speadjalastit álbmoga girjáivuođa. Bargiidpolitihkalaš ulbmilin lea juksat dássedis čoahkkádusa agi ja sohkabeliid dáfus, ja rekrutteret olbmuid geain lea unnitlogu- ja álgoálbmotduogáš.
Sámediggi lea šiehtadan Čáhkkilis bargodili, dg. Inkluderende Arbeidsliv (IA), ja deattuha bargodiliid láhčima juohke bargái. Ohccit geat eai hálddaš sámegiela go virgáduvvojit, sáhttet ovttasráđiid bargoaddiin geatnegahttojuvvot váldit oahpu sámegielas.
Buohkain geat ásset Finnmárkkus ja Davvi-Romssas lea vejolašvuohta oažžut oaniduvvot oahppoloana Stáhta loatnakássas 10 % jahkái gitta 25.000 ru rádjai, sii ožžot maiddái sierra vearrogessosa.
Muđui virgáduvvojit bargit gustojeaddji lágaid, njuolggadusaid ja šiehtadusaid vuođul, dás maiddái bálká ja penšuvdna, ja 6 mánu geahčalanáigi.
Oktavuohta
Eanet dieđuid virggi birra oaččut go válddát oktavuođa:
- Ossodatdirektevrrain Magne Svineng, tlf. +47 915 42 098
- Fágajođiheddjin Lisbeth Vesterheim Skoglund, tlf. +47 993 20 716
Ohcan
Ohcan, oktan skuvla- ja bargoduođaštusaiguin galgá sáddejuvvot elektrovnnalaččat dán siiddus, liŋka bokte "Oza bargui".
Maŋŋel ohcanáigemeari ráhkaduvvo almmolaš ohcciidlistu. Almmolašvuođalága § 25 vuođul sáhttet ohccidieđut almmuhuvvot vaikko ohcci lea bivdán ahte son ii galgga čállojuvvot ohcciidlistui.
Ohcanáigemearri
Borgemánu 6. beaivvi 2019