Konsultašuvnnaid vuođul áigodagas 2012-2018 soabaiga Sámediggi ja Gielda- ja ođasmahttidepartemeanta láhkaárvalusa oktan konsultašuvdnanjuolggadusaiguin. Sámediggi gieđahalai láhkaproposišuvdnaevttohusa geassemánus 2018 ja dohkkehii dan. Ráđđehus lea dál čuovvolan ášši dan bokte ahte lea Stuoradiggái ovddidan láhkaproposišuvnna (Prop 116 L,2018-2018).
-Vaikko njuolggadusat buori muddui leat jagi 2005 konsultašuvdnasoahpamuša joatkkan, de leat dál čađahuvvon vuđolaš ovdabarggut mat dahket hálddašaneiseválddiide ja duopmostuoluide álkibun doahttalit konsultašuvdnarievtti. Dasa lassin lea láhka mihá eambbo geatnegahtti go soahpamuš, dadjá Keskitalo.
-Konsultašuvdnanjuolggadusat sihkkarastet ahte Sámediggi ja eará sámi guoskevaččat servet soabadallamiidda mearrádusaid hárrái main lea mearkkašupmi midjiide. Dat galgá dál maiddái guoskat suohkaniid ja fylkkagielddaid mearrádusaide. Ovttas Sámedikki ođđa bušeahttaortnegiin lean mun vissis dasa ahte dát njuolggadusat huksejit buori vuođu proseassaide ja mearrádusaide mat leat buorrin báikkálaš, regiovnnalaš ja sámi servodatovdáneapmái, loahpaha Keskitalo.
Láhkaproposišuvdna galgá meannuduvvot Stuoradikki gielda- ja hálddašanlávdegottis ovdal go Stuoradiggi mearrida dan.
Gulahallandieđut: sámediggepresideanta Aili Keskitalo, 971 29 305