Oahpahuslága § 4A-1 mielde lea rávisolbmuin geat eai leat čađahan vuođđoskuvlla vuoigatvuohta oažžut heivehuvvon vuođđoskuvlaoahpahusa, ja oahpahuslága § 4A-3 mielde lea rávisolbmuin vuoigatvuohta oažžut joatkkaskuvlaoahpahusa dan jagi rájes go devdet 25 jagi. Lea suohkana ja fylkkasuohkana ovddasvástádus láhčit vuođđoskuvlaoahpahusa ja joatkkaskuvlaoahpahusa rávisolbmuide.
Sámegielkursa rávisolbmuide
Iešguđet guovlluin Sámis leat ollu rávisolbmot geat leat massán iežaset eatnigiela ovdalaš dáruiduhttin politihka geažil. Dan dihte lea stuora dárbu sámegielkurssaide. Sámediggi bargá dan ala ahte láhčit dili nu ahte rávisolbmot besset háhkat dárbbašlaš sámegielmáhtu, earret eará dakko bokte ahte lea ásahan ja doarju sámi giellaguovddážiid. Sámi giellaguovddážat fállet sámegiella kurssaid rávisolbmuide.
Sámi oahppolávdegoddi (SOL) fállá sámi álbmogii rávisolbmuidoahpahusa. Sii dollet sámegiellakurssaid, duodjekurssaid, luonddugeavahankurssaid ja muđui eará sámi kulturfáttáin.
Muđui leat máŋga eará aktevrra main leat fálaldagat sámegielas rávisolbmuide: sámi giellaguovddážat, allaskuvllat ja universitehtat, daid gaskkas maid Sámi allaskuvla.