Ođasmahttin-, hálddahus- ja girkodepartemeanta (OHD) lea borgemánu 16. b. 2013 mannosaš mearrádusain rievdadan juovlamánu 19. b. 2008 mannosaš láhkaásahusa nr. 1480 Sámediggeválgga birra. Rievdadusláhkaásahus lea čállojuvvon ovttas Gielda- ja guovlodepartemeanttain ja Sámedikkiin.
Rievdadusaid duogáš lea go lea rievdaduvvon dat válgaásahus mii gusto válggaide muđui (ođđajagimánu 2. b. 2003 mannosaš láhkaásahus nr. 5), ja go sullasaš muddemat dárbbašuvvojit ovdal čavčča Sámediggeválgga. Rievdadusat dábálaš válgaláhkaásahusas leat geavatlaš lunddot ja dasa gullá earret eará válgalihpuid hábmen, válgaurtnaid gurren ja buot mii gullá ovddalgihtii jienasteapmái.
Rievdadusat mat gustojit láhkaásahussii Sámediggeválgga birra:
- 4. ja 7. paragráfain boahtá vuođđalogu 2001 sadjái 10 jagi áigodat. Duogážin lea go Álbmotregisttar ii almmut registtardieđuid guhkkelebbui maŋás guvlui go logi jagi, ja go Sámedikkis ii leat vejolašvuohta rádjat ovddeš jienastuslohkodieđuid.
- Addojuvvo aiddoleappo mearrádus jienastuslihpu hábmema birra 36. paragráfas. Paragráfa hápmi rievdaduvvo veaháš dainna lágiin ahte mearrádusat dálá njealját lađđasa bustávas d ja viđát lađđasis, váldojuvvojit mielde ođđa njealját lađđasii.
- § 43 vuosttaš lađđasa čujuhusat leat rievdaduvvon nu ahte dat dávistit daidda válgalága ja válgaláhkaásahusa mearrádusaide, mat gustojit seamma láhkai Stuorradiggeválgii.
- Teknihkalaš rievdadus dahkkojuvvo dálá 46. ja 53. paragráfain, mas 53. paragráfa sisdoallu sirdojuvvo 46. paragráfii, ja 53. paragráfa galgá čuodjat seamma láhkai go dábálaš válgaláhkaásahusa 29. paragráfa.
Rievdadusat bohtet fápmui dalán