Sámediggeráđđi Silje Karine Muotka, vuođđooahpahusa váhnenlávdegotti jođiheaddji Elisabeth S. Gundersen ja váhnenlávdegotti lahttu Laila A. Nutti gávnnadedje Kárášjogas mannan vahkus ságastit sámi ruovttu-skuvlla ovttasbarggu.
Sámediggeráđđi, Silje Karine Muotka bokte, oaivvilda ahte ovttasbargu váhnen/fuolaheaddji ja oahpaheddjiid gaskka ferte doaibmat nu bures go lea vejolaš. Vuosttažettiin dan sivas go dat dagaha oadjebas skuvladili ohppiide, muhto maiddái addá dát skuvllaide buori vuođu láhčit ohppiide sosiála ja kognitiiva ovdáneami.
- Lean hui ilus go lávdegottis lea sámi áirras, - lean oadjebas go dieđán ahte vuođđooahpahusa váhnenlávdegoddi dovdá makkár hástalusat sámi guovlluin leat, dadjá Silje Karine Muotka.
Vuođđooahpahusa váhnenlávdegoddi diehtá ahte sámi váhnemat sáhttet vásihit hástalusaid skuvlaovttasbarggus maid eará váhnemat Norggas eai dieđe.
- Erenoamážit vuoigatvuođat giellaoahpahussii. Mii navdit ahte sámi skuvlaváhnemiidda livččii ávkin ásahit fierpmádaga, mii čielgasit sáhttá ovdanbuktit áššiid sihke Sámediggái, eiseválddiide Oslos ja midjiide vuođđooahpahusa váhnenlávdegottis. Vuođđooahpahusa váhnenlávdegotti čehppodagain ruovttu-skuvlla ovttasbarggus sáhttit mii leat veahkkin ásaheamen váhnenfierpmádaga, dadjá vuođđooahpahusa váhnenlávdegotti jođiheaddji Elisabet S. Gundersen.
Oasseváldit leat ovttaoaivilis das ahte lea dehálaš gávnnadit ovtto ságastit daid oahpahusa hástalusaid mat leat sámi guovlluin, ja láhčit dili buori ja ávkkálaš ruovttu-skuvlla ovttasbargui ávkin sámi ohppiide.