Almmuheapmái searvá Sámediggepresideanta Aili Keskitalo, stáhtačálli Anne Karin Olli ja Kárášjoga Sámi Joatkkaskuvla oahppit.
Sámediggi lea Giellavahkku oktavuođas hábmen sátnegirjjáža “Sámás Muinna” applikašuvdnan, man namma lea “Saemesth!”. Dáinna sátnegirjjážiin bovdet somás vuogi mielde hállat sámegiela vuosttaš deaivvadeamis, árgabeaivvis ja doaluin. Das ii leat lossa grammatihkka, dušše muhtun ávkkálaš dajaldagat. De ii leat eará go hállagoahtit.
Sátnegirjjáš ráhkaduvvui “Sámás muinna”-kampánja oktavuođas, ja dat lea ain hui bivnnut ja ollugat jearahit dan. Dan dihte lea Sámediggi mearridan digitaliseret dan vuoi lea álki váldit atnui. Dál sáhtát dan váldit mielde dan vaikko gosa, nu guhká go dus lea jierbmetelefovdna. Sánit ja dajaldagat leat lulli-, julev- ja davvisámegillii ja muhtin dáin lea maid jietnabáddi.
