Sámediggeráđđi lea dál ovddidan ášši Sámedikki dievasčoahkkimii, dainna ávžžuhusain ahte hilgu ruvkedoaimma plánaid Nussirii ja Gumpenjunnái.
- Mii bivdit Sámedikki dievasčoahkkima hilgut ruvkedoaimma Nussiris. Eai ruvkedoaimmahat ii ge ráđđehus leat dássážii bidjan mearrideaddji deattu birasgáhttemii, dálá bistevaš ealáhusaide ja sámi kultuvrii ja servodahkii, lohká sámediggeráđđi Silje Karine Muotka.
Gielddaministtar dohkkehii regulerenplána njukčamánu 2014 maŋŋil go Sámediggi geigii vuosttaldeami plánaide 2011:s. Birasdirektoráhta attii lobi ruvkeplánaide nuoskkidanlága mielde juovlamánu 2015, dán mearrádussii lea sámediggeráđđi čájehan vuostehágu konsultašuvnnain. Sámediggeráđis lea maid ođđajagimánus 2016 leamaš čoahkkin Nussir ASA:in muhto das ii boahtán soahpamuš.
- Mis gávdnojit vuđolaš duođaštusat dasa ahte dán ruvkedoaimmas leat viiddis váikkuhusat guolásteapmái, boazodollui ja birrasii. Mu mielas prošeavtta ekonomalaš ja servodatlaš buorit váikkuhusat leat huksejuvvon jáhkkimiid nala, mas eai gávdno reguleremat mat sihkkarastet ahte árvvuid váldooassi bisána báikkálaččat. Nussir-plána lea danin ekonomalaš ja biraslaš allariskaprošeakta mas stohket báikkálaš servodagain. Sámediggeráđđi evttoha danin ahte Sámediggi dahká čielga mearrádusa das ahte dát ruvkedoaibma bissehuvvo, lohká sámediggeráđđi Silje Karine Muotka.
Ášši meannuduvvo Ealáhus- ja kulturlávdegottis 29.02-01.03.2016 ja Sámedikki dievasčoahkkimis njukčamánu 2.b.2016.