Sámedikki presideanta Aili Keskitalo ja sámediggeráđđi áigot idjadit olgun sotnabeaivve vuostá ija. Sii dahket nugo earát miehtá riikka, ja servet kampánjii #nattinaturen maid Norsk Friluftsliv (Norgga Olgoáibmoeallin) organisere.
-Mii oađđit dieđusge lávus, nu movt sámi álbmot lea dahkan don dolaža rájes go mii jođiimet meahcis, muitala Sámedikki presideanta Aili Keskitalo.
Sámi kultuvrras lea olggustallan riggudahttán hui sakka eallima. Dat lea deattuhuvvon gieskat almmuhuvvon dutkanbohtosiin mat čájehit ahte sámi nuorat leat eanemusat árjjalaččat meahcis.
Muhto eallin luonddus mearkkaša sámiide maiddái ollu eanet; namalassii lea dat sámi kulturvuođus. Danne leat Sámedikki presideanttas máŋga ákka manne searvat #nattinaturen-kampánjii.
-Vuosttažettiin orru mu mielas deaŧalaš ávžžuhit olbmuid vánddardit luonddus psyhkalaš ja fysalaš čálggu dihte. Muhto munnje lea seamma deaŧalaš áŋgiruššat luonddu ceavzilis geavahemiin. Mun háliidan ahte maiddái mu mánáidmánát, ja fas sin mánáidmánát, galget oažžut vejolašvuođa eallit luonddus ja ávkkástallan luonddu riggodagaiguin, joatká Keskitalo.
Ceavzilis luondduin ávkkástallan lea árbevirolaš sámi ealáhusaid dovdomearka. Ovdamearkan leat boazodoallu, guolástus, bivdu, muorječoaggin ja eará ávkkástallan. Muhto Sámedikki presideanta čujuha maiddái ođđa sámi ealáhusain, nugo mátkeealáhusain, lea ceavzilis olggustallan vuođđun.
Son váldá ovdan mátkeealáhusaktevrra Gallas, mii veahkeha ráđi geavatlaččat lávvardaga idjadeamis.
-Jos Gallas háliida, de lea das stuorra vejolašvuohta sáhttit buktit bargosajiid sihke sámi kultuvrra ja olggustallama vuođul. Ollu mátkkošteaddjit háliidit eakti ja ceavzilis luondduvásihusaid, ja mus lea stuorra jáhkku dasa ahte ođđaáigásaš mátkeealáhusat mat vuođđuduvvojit árbevieruide sáhttet leat deaŧalaččat sámi servodaga boahtteáigái, dadjá Sámedikki presideanta Aili Keskitalo loahpas.
Dieđut:
Sámediggeráđđi idjada Vikas olggobealde Rørosa čakčamánu 5. – 6. b. Presideantta Aili Keskitalo lassin idjadit maiddái sámediggeráđi lahtut Thomas Åhren, Ann-Mari Thomassen, Henrik Olsen ja Silje Karine Muotka olgun.
Norgga Olgoáibmoeallin, mii lea 15 eaktodáhtolaš olggustallanorganisašuvnnaid oktasaš organisašuvdna, lágida #nattinaturen-kampánjja. Nu ollu go 700 politihkkara miehtá riikka leat dieđihan ahte servet kampánjii. Eanet dieđuid gávnnat dákko: http://www.norskfriluftsliv.no/nattinaturen/
Jos ležžet jearaldagat sámediggeráđi olgun idjadeami birra, de sáhtát váldit oktavuođa Runar Myrnes Balto:in, tel. 97773778.