Várrepresideanta Henrik Olsen lea jierástuvvan evttohusa geažil ásahit Sámi dearvvašvuođasiidda. Son doarju Finnmárkku Dearvvašvuođa bargojoavkku mii rávve ásahit Sámi dearvvašvuođa siidda.
- Dát lea buorre vuođđun dasa ahte nannet psyhkalaš dearvvašvuođasuodjalusa ja gárrendivššu sihke dáža ja sámi álbmogii Finnmárkkus. Seammás lea stuorra nanusvuohta dat ahte háliidit čohkket resurssaid psyhkalaš dearvvašvuođas ja eará spesialistadearvvašvuođabálvalusain, gávnnaha Henrik Olsen.
SÁNAG lea barggus bokte ovddidan máhtu ja vásáhusaid mat leat árvvolaččat sámi buhcciid dikšuma oktavuođas. Evttohus ásahit Sámi dearvvašvuođasiidda fuolaha seammás fálaldaga sámi buhcciide miehtá riikka. Olsen deattuha ahte spesialistadearvvašvuođafálaldaga nannen sámi álbmogii, mearkkaša maiddái fálaldaga nannen olles álbmogii. Sámi dearvvašvuođasiidda ásaheapmi lea guhkes lávki dan guvlui ahte juksat dásseárvosaš bálvalusa sámi álbmogii.
- Duohtavuohtan lea ahte dálá fálaldagas eai leat doarvái sámegielat fágaolbmot. Danne lea ávkkálaš hukset nana fágaásahusaid ja –birrasiid, sihke dikšofálaldaga dáfus ja dan boahtteáigái rekrutterema dáfus sihke psyhkalaš dearvvašvuhtii ja gárrenfuolahussii, deattuha Olsen
Gulahálli
Várrepresideanta Henrik Olsen, tel. +47 907 75 219