Sámediggeráđđi, várrepresideantta Laila Susanne Vars ja ráđđelahttu Vibeke Larsen bokte, lea deaivvadan sámi ásahusaid ja sámi dutkanbirrasiid ovddasteddjiiguin ja mii leat guorahallan fáttáid sámi ásahusovddideapmi ja sámi dutkan.
Mii oaččuimet ollu buriid árvalusaid goappašiid fáttáide, dadjaba sámediggeráđi ovddasteaddji guovttos ja leaba duhtavaččat.
- Fáttá, sámi ásahusovddideapmi oktavuođas deattuhuvvui earret eará ahte ásahusaid servodatbargu berre biddjojuvvot beaiveortnegii – ja Sámediggi oaččui čielga dieđuid ásahusaid beales ahte eat galgga ballat bidjamis čielga vuordámušaid ásahusaide, dadjá ráđđelahttu Vibeke Larsen.
Čoahkkima oasseváldit bivde vuoruhit masterdási studeanttaid ja doavttergrádastipendiáhtaid sámegielas boahtte viđa guđa jagi áigodagas, danne go mis lea ovddabealde buolvamolsun muhtun jagiid geahčen, go boares gielladutkiid sadjái fertešeimmet oažžut nuorat olbmuid.
- Mun bidjen merkii čielga rávvaga, ahte Sámediggi berre joatkit stipeandda vuoruhemiin sidjiide geat váldet alit oahpu sámegielain, danne go sámi giellagelbbolašvuhtii lea dárbu juohke sajis servodagas. Nu ahte mii áigut joatkit dainna, ja mun ávžžuhan erenoamážit davvisámi nuoraid váldit alit oahpu julev- ja máttasámegielain, dadjá Sámedikki várrepresideanta Laila Susanne Vars.
Gulahallanolmmoš:
Várrepresideantta Laila Susanne Vars, tlf. 977 54 102
Ráđđelahttu Vibeke Larsen, tlf. 941 30 116