Dat vuosttaš válgabiiret gos sáhttit vuordit gaskaboddosaš válgabohtosiid disdaga čuovganeapmái leat Ávjovárri ja Davvi.
Dán guovtti válgabiires čielgá válgaboađus dannego buot suohkaniin dán guovtti válgabiires leat eanet go 30 olbmo Sámedikki válgajienastuslogus ja doppe lohket ieža ja raporterejit elektrovnnalaččat. Nu sáhttet lohkanbáikkit Kárášjohka ja Áltá oaidnit bohtosiid dakkaviđe go lohkamiin leat geargan buot suohkaniin diein biiriin.
Dain eará válgabiiriin leat gielddat main lea unnit go 30 jienastuslogus. Dat suohkanat eai loga ieža jienaid muhto sáddejit jienaid lohkanbáikái.
Goas lea loahpalaš válgaboađus čielggas:
Loahpalaš válgaboađus sáhttá ádjánit gitta guokte vahku. Čilgehus dasa lea dat go buot dat 296 suohkana Norggas main leat vuollel 30 olbmo Sámedikki válgajienastuslogus, šaddet sáddet jienaid lohkanbáikkiide.
Ovddalgihtii jienasteapmi loahpahuvvo bearjadaga 8.9.17. Dan maŋŋil galget jienat de sáddejuvvot lohkanbáikkiide. Norgga boastadoaimmahat ii viečča ja doalvvo šat boastta lávvordagaid. Dát maŋida lohkama. Stuoradiggeválggaide lea seammaládje.
Sámediggeválggaid olis leat dát lohkanbáikkit:
- Lulli-Norgga válgabiire: Oslo
- Lulli-Sámi válgabiire: Steinkjer
- Viesttarmeara válgabiire: Áhkánjárga/Narvik
- Gáisi válgabiire: Romsa/Tromsø
- Davvi válgabiire: Áltá/Alta
- Ávjovári válgabiire: Kárášjohka/Karasjok
- Nuorta válgabiire: Deatnu/Tana