Ruovdavuona bajásšaddanguovddáš lea ožžon doarjaga Sámedikkis čađahit prošeavtta mearrasámi kultuvrra ja vuotnaguolásteami birri. Sámediggeráđi mielas lea buorre go bajásšaddanguovddáš háliida čalmmustahttit mearrasámi kultuvrra oassin oahpahusas, ja danne juolluduvvo 55 000 ruvdnosaš doarjja prošeavtta čađaheapmái.
- Sámediggi áŋgiruššá dihtomielalaččat sámi árbedieđuin vuođđooahpahusas. Danne lean hui ilus go Ruovdavuona bajásšaddanguovddáš lea álggahan dán prošeavtta. Mátta-Várjjagis lea rikkis sámi kulturhistorjá, man buot oahppit berrejit muosáhit, dadjá Sámedikki várrepresideanta Laila Susanne Vars.
Prošeavttas bargá skuvla ovttas báikkálaš joavkkuiguin ja servviiguin, earret eará Mátta-Várjjaga mearraluossaservviin, háhkan dihtii Ruovdavuona mearrasámi kultuvrra báikkálaš árbedieđu. Prošeakta čatnasa Máhttoloktema oppalaš oassái kulturárbbi ja identitehta birra, mas deattuhuvvo ahte lea erenoamáš deaŧalaš fuolahit kulturhistorjjá ja sámi giela ja kultuvrra.
- Mii leat ovdal juolludan doarjaga Billávuona bajásšaddanguovddážii ja Deanu sámeskuvlii čađahit sullasaš prošeavttaid. Mii leat hui ilus go eanet skuvllat dál čalmmustuhttet sámi árbedieđu oahpahusas. Sámediggeráđđi oaidná ahte dárbbašuvvo eanet áŋgiruššan sámi árbedieđuin skuvllas ja áigu bovdet guovddáš eiseválddiid stuorát áŋgiruššamii árbedieđuin fuolahan ja ovddidan dihtii sámi giela ja kulturmáhtu, dadjá Sámedikki várrepresideanta Laila Susanne Vars.
Ruovdavuona bajásšaddanguovddáš lea Mátta-Várjjaga gielddas, sullii 25 km olggobealde gielddaguovddáža Girkonjárgga. Skuvlajagis 2011/2012 leat bajásšaddanguovddážis oktiibuot 27 oahppi. Prošeavtta leat jurddašuvvon ohppiide 5. -7. luohkáid ja 8. – 10. luohkáid ohppiide. Ruovdavuotna lea keailu Várjjatvuonas.
Gulahalli:
Sámedikki várrepresideanta Laila Susanne Vars, elt. 977 54 102.