Sámediggi juolluda golbma miljon ruvnnu mearkagálvoovddidemiin, vuovdimiin, vuovdalemiin ja gealbudemiin duodjeealáhusas.
Ráđđelahttu Marianne Balto dadjá ahte duodji lea identitehtaduddjoma deaŧalaš doaibma mas lea stuorra mearkkašupmi sámi kultuvrii ja gillii.
-Sámedikki mihttomearri lea ovddidit duoji dakkár ealáhussan mii lea gánnáhahtti ja mii vuovdá eanet iežas buvttaduvvon gálvvuid. Oktiibuot golbma miljon ruvdnosaš juolludus lea lávki rivttes guvlui ovddideamis hutki ja márkandiđolaš ealáhusa, mii ii leat nu sorjavaš doaibmadoarjagii, dadjá Balto.
Mearkagálvoovddideapmi
Duojáriid Ealáhussearvi ja Sámiid Duodji háliidit nannet duoji mearkagálvun. Danne sii háliidit ráhkadit guhkesáigge plána dasa mo oččodit nana mearkagálvvu boahtteáigái ja mo dan galgá doaimmahit boahtteáiggis.
Sámediggi juolluda 782 850 ru prošektii.
Ráđđelahtu Marianne Balto mielas lea deaŧalaš ahte duodji boahtá eanet oidnosii ja ahte dan lea álkit fidnet márkanis. Danne lea vuovdaleami ja vuovdima nannen deaŧalaš doaibmabidju.
Buoret gelbbolašvuohta
Sámediggi juolluda 495 000 ru doarjjan Duojáriid ealáhussearvái ja Sámiid Duodjái álggahit dutkamii buvttadeamis, vuovdaleamis ja vuovdimis. Sámi allaskuvllas lea ovddasvástádus kurssaid čađaheamis.
Duojáriid ealáhussearvi ja Sámiid Duodji háliidit loktet gelbbolašvuođa duodjeealáhusas. Dutkan lágiduvvo nu ahte dat addá 15 oahppočuoggá 3 mánu áigodagas. Dutkamii gullá oahpahus duodjeteknihkain, mašiinnaid geavaheapmi, teknologiija čájeheapmi ja oahpahus teknologiijas ja vuovdin ja vuovdaleapmi.
-Dárbu loktet gelbbolašvuođa ođđa teknologiija geavaheamis, vuovdimis ja vuovdaleamis duodjeealáhusa lea stuoris, ja danne mii leat juolludan ruđaid prošektii, dadjá ráđđelahttu Marianne Balto.
Bagadeaddjivirgi duojis
Sámediggi juolluda miljon ruvnnu bagadeaddjivirgái Nuorta- ja Gaska-Finnmárkkus. Duodjeinstituhtta Guovdageainnus dat háliida nannet duoji kultuvran, fágan, ealáhussan ja lotnolasealáhussan Nuorta- ja Gaska-Finnmárkkus. Prošeakta bistá jagi.
Duodjeinstituhtta ulbmil lea ovddidit duoji dakkár giehtaduodjin ja ealáhussan mas lea ealáhusovddideapmi ja mii addá ođđa bargosajiid sámi giehtaduodjevieruid vuođul.
-Go mii dál áŋgiruššat nu nannosit mearkagálvoovddidemiin ja gealbudemiin iežamet dutkamiid vuođul, de lea lunddolaš ahte dat čuovvoluvvo bagadeddjiin gii sáhttá veahkehit duojáriid váldit atnui ođđa teknologiija ja šaddat eanet márkandiđolažžan, dadjá ráđđelahttu Marianne Balto.
Ekonomiija- ja rehketdoallokursa
Sámediggi juolluda 495 000 ru ekonomiija- ja rehketdoallokursii duojáriid várás. Duojáriid ealáhussearvi ja Sámiid duodji dat háliidit nannet ealáhusa ekonomiija- ja rehketdoallogelbbolašvuođa. Kurssat galget dollojuvvot čieža báikkis Snoasa rájes máddin Deanu rádjai nuortan. Kurssaid fáddán lea earret eará fitnodagaid registreren, buvttaregistreren, girjefievrrideapmi, rehketdoallu ja doaibmadoarjjaortnega ohcaskoviid guorahallan.
-Sámediggi lea dárkkistan máŋga duojára geat leat ožžon doaibmadoarjaga Sámedikkis. Dárkkisteapmi čájeha ahte máŋgasiin ii leat doarvái buorre máhttu rehketdoalus, ja danne lea buorre ahte ealáhus háliida nannet duojáriid ekonomiijagelbbolašvuođa, dadjá ráđđelahttu Marianne Balto.
Eanet dieđut Marianne Balto 480 63 358