Sámi valáštallan oaččui 2005:s vuosttaš gearddi speallanruđaid. Dát lei sámi valáštallandoaimmaid dehálaš dohkkeheapmi, muhto Sámediggeráđi lahttu Terje Tretnes oaivvilda ahte dárbbašuvvojit mihá stuorát doargat jus galgá sáhttit dustet valáštallama hástalusaid.
Almmuhan
Kuhmunen, John-Marcus.
Maŋumustá rievdaduvvon 20.04.2006
Sámi valáštallan oaččui 2005:s vuosttaš gearddi speallanruđaid. Kultur- ja girkodepartmeanta bijai 300 000 ruvnno dan doibmii. Dát lei sámi valáštallandoaimmaid dehálaš dohkkeheapmi, muhto Sámediggeráđi lahttu Terje Tretnes oaivvilda ahte dárbbašuvvojit mihá stuorát doargat jus galgá sáhttit dustet daid ollu hástalusaid mat sámi valáštallamis leat.
- Sámi valáštallamis leat hui erenoámaš dárbbut ja dál, ovdamearkka dihtii, eai oaččo heargegilvvohallamat ja njoarosteapmi dan doarjaga maid dat dárbbašit. Mii vásihat ahte sámi valáštallan dávjá ii oaččo maidege dain valáštallanruđain, mat muđui juolluduvvojit Norggas. Ferte maiddái rahčat vai sámi valáštallan geasuha mánáid ja nuoraid, dadjá Tretnes.
Sámediggi lea 2006 várás várren 1,7 milj. ruvnno Norgga beale Sámi valáštallanlihttui, Sámi spábbačiehkčanlihttui ja Sámi valáštallanlihtu oassálastimii Arctic Winter Games:ii, mii dán jagi lágiduvvui Aláskas. Dát lea Tretnes mielas deaŧalaš áŋgiruššan, muhto guhkkin eret doarvái.
- Sámedikkis ii leat vejolašvuohta várret eanet ruđaid Sámi valáštallamii iežas bušeahttarámma siskkobealde, vaikke vel dárbbut leat ge stuorrát. Danne lea deaŧalaš ahte Sámi valáštallan oažžu speallanruđaid maiddái boahtteáiggis, ja ahte submi muddejuvvo juohke jagi dassážiigo boahtá dan dássái maid sámi valáštallan ánssáša, lohpaha Tretnes.