Ásahus Davveoarjesámi museasiida lea dál vuođđuduvvon. Davveoarjesámi museasiida nanne museaid Sámiid Vuorká-Dávvirat, Porsanger museum, Kokelv sjøsamiske museum ja Guovdageainnu gilišilju.
Almmuhan
Kuhmunen, John-Marcus.
Maŋumustá rievdaduvvon 04.05.2006
Ásahus Davveoarjesámi museasiida lea dál vuođđuduvvon. Davveoarjesámi museasiida nanne museaid Sámiid Vuorká-Dávvirat/De samiske samlinger, Porsanger museum, Kokelv sjøsamiske museum ja Guovdageainnu gilišilju/Kautokeino bygdetun. Nannen lea oassi našuvnnalaš museaođastusas ja mielddisbuktá museaid bálddalas doaimmaheami ja bargiidhálddašeami. Ásahusa stivrajođiheaddji lea Liv Østmo. Stivrras leat vel Kåre Olli, Ingar Eira, Reidar Erke ja Marit Reiersen.
Sámedikki várrepresideanta, Johan Mikkel Sara, lea hui ilus go ásahus dál lea vuođđuduvvon, ja sus leat stuora vuordámušat viidáset bargui.
– Dál ferte Kultur- ja girkodepartemeanta čuovvolit museaođastusa ruhtajuolludemiiguin, maiddái sámi museaide, dadjá Sara.
Stivrajođiheaddji Liv Østmo dadjá ahte ásahusas leat stuora hástalusat.
– Museaid nannen lea dehálaš oassi ovddidanbarggus mii lea dárbbašalaš vai museat šaddet nanu ásahussan sámi servodagas. Álgoálbmotoktavuođas lea earenoamáš dárbbašlaš ahte mis leat bures hábmejuvvon ásahusat main lea alla fágalaš kvalitehta, mat sáhttet čohkket, várjalit ja gaskkustit min historjjá, kulturárbbi ja árbevierromáhtu. Musea guovddáš doaibma lea lagadit sámi historjjá ja kultuvrra álbmogii. Earenoamáš mávssolaš doaibma lea gaskkustit ja viidáset ovddidit sámi identitehta, dadjá Østmo.