Keskitalo eaktuda dál ahte eará vuoruhuvvon sámi ásahusat ge ruhtaduvvojit ja huksejuvvojit dán stuorradiggeáigodagas.
- Sámi báikkálaš searvegottit sorjájit sámi giela, kultuvrra ja ealáhusaid deaivvadanbáikkiin. Erenoamážit nuortasámi kultuvra dárbbaša sakka buriid doaibmabijuid, ja sii leat ferten vuordit guhká ovdalgo musea huksenbarggut álggahuvvojit. Danne lea dát juolludus erenoamáš illudahtti, dadjá Keskitalo.
Sámediggi háliida dán sámedigge- ja stuorradiggeáigodagas vuoruhit Ája sámi guovddáža, Sámi dáiddamusea, Saemien Sijte ja Nuortasámi musea huksemiid. Stáhtaráđit Bjarne Håkon Hansen ja Kristin Halvorsen leaigga ovttamielas dán vuoruheapmái čoahkkimis Sámediggeráđiin guovvamánu 23. b. 2006. Stuorradikki gielda- ja hálddašanlávdegoddi lea, Sámedikki jahkedieđáhusa meannudeami oktavuođas, maiddái deattuhan dáid huksenplánaid čađaheami mávssolašvuođa.
- Guovddáš sámi ásahusat eai govčča sámi servodaga dárbbuid, ja dáid prošeavttaid čađaheapmi lea danne hui deaŧalaš olles sámi servodahkii, deattuha Keskitalo.