Sámediggeráđđi lea duhtavaš go bealit dán jagi eanadoallošiehtadallamiid loahppameanuin šadde ovttaoaivilii eanedit Finnmárkku mielkeeriid, nu mo Sámediggi lei evttohan. Lassáneapmi lea 1 miljon lihtera.
- Mielkebuvttadeapmi lea áibbas dárbbašlaš sámi eanadollui ja Finnmárkku eanadollui. Fylkkas leat uhccán molssaektosaš eanadoallovuogit, ja aiddo danne lea gussamielkebuvttadeapmi nu deaŧalaš sámi kulturárbbiid bisuheampmái, dadjá ráđđelahttu Terje Tretnes.
Sámediggeráđđi ovddidii gáibádusaidis mielkeeriid lasiheami hárrái eanadoallošiehtadalla¬miidda čoahkkimis stáhtaráđiin Terje Riis-Johansen cuoŋománus. Lasihuvvon mielkeearit nannejit dáláš eanadoalu fylkkas, seammás go álkiduhttet barggu rekrutteret nuoraid ja nissonolbmuid ealáhussii. Finnmárkkus leat dál 185 mielkebuvttadeaddji lávdaduvvon 48.000 njealjehaskilomehtera sturrosaš guvlui, ja Finnmárkku mielkeearri lea birrasii 19 miljon lihtera
- Mii áigut joatkit min ovttasbarggu Finnmárkku fylkkamanniin ja váikkuhit dan ahte dán jagáš earrelassáneapmi boahtá ávkin ovdánahttindoaluide ja doaluide maid earri lea vuollel 100.000 lihtera. Min ulbmil lea ahte galgá leat vejolaš eallit mielkebuvttadandietnasiin fylkkas, deattasta Tretnes.