Sártnistis ONa bistevaš foruma guđát sešuvnnas ovddit vahkus deattuhii Sara ahte eamiálbmogiid ja sin vuoigatvuođaid dohkkeheapmi lea dehálaš reaidu juksamis ONa duhátjahkemihttomeari.
- Dan duhátjahkemihttomeari oktavuođas ahte unnidit geafivuođa, lea maiddái deaŧalaš álggahit doaibmabijuid eamiálbmogiid várás. Mun lean fuolastuvvan go dat rámmat mat dán rádjai leat biddjojuvvon, eai čielgasit dovddat dan, dadjá Sara.
Sáhkavuorustis deattuhii Sara erenoamážit man deaŧalaš lea gárvvistit ja dohkkehit ONa eamiálbmotjulggaštusa. Son čujuhii viidáseappot davviriikkalaš sámekonvenšuvnna barggu mávssolašvuhtii.