- Dás lea sáhka vuođđoealáhusaid ovttaláhkai meannudeames. Mii eat bivdde eará ortnegiid boazodollui go daid ortnegiid mat eará vuođđoealáhusain Norggas leat. Mii háliidit ahte stáhta njulge dán bonjuvuođa, dadjá ráđđelahttu Randi A. Skum.
Boazodoalu ekonomalaš lávdegoddi lea rehkenastán ahte boazodoalus lea eará vuođđo¬ealáhusaid ektui 31,5 miljon ruvnno eanet vearro- ja divatgolut jahkásaččat. Raporta čájeha áigodagas 2003-2004 ahte investerengolut boazodoalus leat lassánan 14,3 miljon ruvnno. Sámediggeráđđi bivdá Ráđđehusa ráhkkanahttit ja divvut ášši boahttevaš boazodoallošiehtadallamiid oktavuođas.
- Boazodoallu ferte maid dađistaga investeret ođđa ja ulbmillaš mašiinnaid ja dávviriid, nugo eará ge vuođđoealáhusat. Ja ealáhusa loguin oidno ahte investeremat ealáhusas lassánit. Dalle lea eahpegovttolaš ahte boazodolliin leat earálágan vearro- ja divateavttut go vástesaš doaimmain. Mii eaktudit ahte dát ášši ii njulgejuvvo dainna lágiin ahte boazodoallošiehtadusa rámmat unniduvvojit, dadjá Skum.