Almmuhan
Kuhmunen, John-Marcus.
Maŋumustá rievdaduvvon 15.06.2006
- Dán jagáš dáiddáršiehtadus lea stuorra lasáhus go buohtastahttá jagi 2006 šiehtadusain. Šiehtadusas lasihit doaibmadoarjaga dáiddárorganisašuvnnaide ja duppalastet sámi dáiddafoandda sturrodaga. Dáinna Sámediggi nanne sihke dáidaga ja kultuvrra, lohká ráđđelahttu Terje Tretnes.
Šiehtadus fátmmasta dáiddarorganisašuvnnaid doaibmadoarjaga, sámi dáiddárstipeanddaid, govvadáidaga ja dáiddaduoji oastinortnega, ja sámi dáiddafoandda. Sámedikki dievasčoahkkin galgá dohkkehit šiehtadusa čakčamánu 2006. Šiehtadus čuovvola Dáiddaršiehtadusa váldošiehtadusa beaiváduvvon borgemánu 19. beaivvi 2004.
Sámi Dáiddárráđi šiehtadallanlávdegoddi oaivvilda ahte Sámedikki šiehtadallit leat leamaš fidnolaččat, ja leat doallan buori ságastallama šiehtadallanproseassas.
- Mii leat duhtavaččat go Sámediggi lasiha juolludusa sámi dáiddaulbmiliidda. Dat čájeha ahte ovttasbargošiehtadusas maid mii leat vuolláičállán Sámedikkiin leat buorit váikkuhusat, lohká Sámi Dáiddárráđi jođiheaddji Mathis Hætta.