Sámediggeráđđi lea duhtavaš go ON váldočoahkkin dál, maŋŋá 22 jagi diplomatiija, meannuda ON eamiálbmot vuoigatvuođa julggaštusárvalusa.
Julggaštusbarggu álggahii ON ovddeš eamiálbmotbargojoavku nu árrat go 1984:s.
- Mun deattuhan ahte eamiálbmogiin lea stuorát ágga lea duhtavaš go sámiin, danne go sin dilli lea nu ollu vearrát go min dilli. Muhto mii maid leat duhtavaččat, erenoamážit go davviriikkat leat sakka dorjon julggaštusbarggu. Go ON váldočoahkkin mearrida julggaštusa, de bidjá dat riikkaidgaskasaččat buoret rámma ovttasbarggu ja árvvus atnima hárrái našonala stáhtaid ja eamiálbmogiid gaskka máilmmis, oaivvilda Sámedikki presideanta Aili Keskitalo.
Norgga ráđđehus lea ovttasráđiid Sámedikkiin ja Sámiráđiin 1994 rájes bargan aktiivvalaččat ON olmmošvuoigatvuođa ráđi (ovdal komišuvdna) ektui go guoská ON eamiálbmot vuoigatvuođaid julggaštusárvalussii. ON olmmošvuoigatvuođa ráđđi mearridii guovvamánus dán jagi loahpalaš evttohusa, mii otne lea mearriduvvon sáddejuvvot ON váldočoahkkimii loahpalaš mearrádussii. Váldočoahkkin mearrideaš julggaštusa ovdal jagi 2006 loahpa.
- Váddáseamos fáttáid gaskkas leat leamaš eamiálbmogiid iešmearridanprinsihpat. Muhto mii leat ožžon ollislaš ja áššedovdi veahki Ráđđehusas Olgoriikkadepartemeantta bokte ja ON bissovaš Norgga degašuvnna bokte. Ollu beroštumit leat leamaš mielde ja oainnut eamiálbmot vuoigatvuođaide leat leamaš oalle muddui iešguđet láganat. Muhto juste dan geažil illudahttá ge maiddái dat buorre boađus, dadjá Keskitalo.