Keskitalo deattuha ahte ii leat sáhka ođđa vuoigatvuođaid ásaheami birra, muhto lea sáhka dohkkehit daid vuoigatvuođaid mat sápmelaččain dál leat ja maid sii eai leat goassege luohpan.
- Mearra olggobealde Finnmárkku lea álo leamaš hui dehálaš sámi kultuvrii ja ealáhussii mearragáttiin. Sápmelaččat eai leat goassege luohpan meara riggodagain, ja danne ii sáhte eahpidit sápmelaččaid vuoigatvuođaid mearrariggodagaide, deattuha Keskitalo.
Ráđđehus almmuhii mannán bearjadaga lávdegotti mii galgá čielggadit sápmelaččaid ja earáid vuoigatvuođaid meara riggodagaide olggobealde Finnmárkku. Ovdalaš alimusrievttijustitiárius Carsten Smith galgá jođihit lávdegotti, ja čielggadeapmi galgá gárvvistuvvon ovdal go jahki 2007 nohká. Sámediggeráđđi lea duhtavaš lávdegotti čoahkádusain, ja go čielggadeami galget iešráđđejeaddji áššedovdit čađahit.
- Mii eaktudit, nu go dagaimet Finnmárkolága oktavuođas, ahte lávdegoddi atná álbmotrievtti vuođđun. Dat mearkkaša ahte konklušuvnnat ja doaimmat maid lávdegoddi gávnnaha, fertejit vealtakeahttá leat eamiálbmotvuoigatvuođaid álbmotrievtti rámmaid siskkobealde. Seammás lea dehálaš deattuhit ahte mii eat hálit hálddašeami etnisitehta vuođul, muhto hálddašeami mii lea vuođđuduvvon guovlluide ja ássamii, dadjá Keskitalo.