Sámediggi mearridii geassemánu 1. b. 2006 gaskaboddosaš njuolggadusaid Finnmárkkuláhkii. Njuolggadusat galget leat veahkkin ja oaivadussan áššemeannudeami ja geavahusa oktavuođas Finnmárkkulága ektui.
Muital maid oaivvildat
Vuolábealde gávnnat gaskaboddosaš njuolggadusaid, gulaskuddanreivve ja gulaskuddanbagadusa. Dáid dokumeanttaid vuođul sáhttá juohkehaš sáddet cealkámušaid njuolggadusaid birra.
Gulaskuddancealkámušaid sáddemii lea E-poastačujuhus: samediggi@samediggi.no. Don sáhtát maid coahkkalit leaŋkka "Sádde gulaskuddancealkámuša" dás vuolábealde.
Gulaskuddanáigemearri
10.11.2006.
Gulaskuddanproseassa birra
Sámedikki mielas lea deaŧalaš ja oaidná čielga ávkki das go lea viiddis, álbmotlaš ja demokrahtalaš gulaskuddanproseassa dan oktavuođas go hábmejuvvojit bissovaš njuolggadusat. Njuolggadusaid legitimitehta, ja go álbmot ádde ja dohkket daid sisdoalu, eaktuda ahte sii ožžot dieđuid ja vejolašvuođa váikkuhit.
Sámediggi áigu danne erenoamážit deattuhit rabas ja searvadeaddji proseassa go bissovaš njuolggadusat hábmejuvvojit meahccegeavaheami rievdamis Finnmárkku fylkkas. Ávžžuhit buot áššeoasálaččaid geat háliidit buktit árvalusaid searvat aktiivvalaččat dán bargui.