- Lea hui dehálaš eamiálbmogiidda ieža dutkat diliset birra ja iežaset eavttuid vuođul searvat riikkaidgaskasaš máhtolašvuođahuksemii davviguovlluid birra, cealká sámediggepresideanta Aili Keskitalo arktalaš parlamentarihkariid konferanssa oktavuođas.
Almmuhan
Kuhmunen, John-Marcus.
Maŋumustá rievdaduvvon 02.08.2006
- Lea hui dehálaš eamiálbmogiidda ieža dutkat diliset birra ja iežaset eavttuid vuođul searvat riikkaidgaskasaš máhtolašvuođahuksemii davviguovlluid birra. Danne mii ávžžuhit sámi dutkanbirrasiid geahččalit ásahit ovttasbarggu eará eamiálbmot dutkanbirrasiiguin Árktisis. Boahtteáiggi industriijavuoruheapmi davviguovlluin sáhttá čuohcat garrasit eamiálbmogiid dillái. Danne berre boahtteáigái ásahit sierra prográmma lagas ovttasbargui eamiálbmotdutkkiid gaskkas Alaskas, Canadas, Ruonáeatnamis, Ruoššas ja Skandinavias. Dát šaddá sierra čuolbmačilgehussan Árktalaš parlamentárakonferánssas mii rahppo odne Gironis, dadjá Norgga Sámedikki presideanta Aili Keskitalo.
- Árktalaš eamiálbmogiid kultur- ja máhtolašvuođa árbevierru lea máŋggaid duháhiid jagiid ovdánan. Iešguđetge eamiálbmotservodagain lea kulturárbevierru man vuođđun lea luondduriggodagaid čohkket iežaset guovlluin. Dan geažil lea sin kulturárbevierus vuđolaš máhttu luonddu ja dan ceavzilvuođa birra dain ravdaguovlluin. Dan máhtu lea hui dehálaš várjalit. Muhto lea maiddái dehálaš fátmmastit dan máhtu ođđa doaimmaide mat čuvvot boahttevaš oljo- ja gássaindustriija Árktisis. Boahtteáiggi dutkamis industrijáladoaimmaid váikkuhusain Árktisii dahket eamiálbmogiid vásáhusat ja máhtolašvuohta dehálaš ja earenoamáš perspektiivva birrasii ja daidda hástalusaide maid huksejeaddjit šaddet vásihit dakkár rašes luonddus. Earenoamážit movt davviguovlluid industriijavuoruheapmi váikkuha olbmuide ja kultuvrii sáhttet dutkkit geain lea dakkár duogáš mas dás lea sáhka, čilget buorebut, dadjá Ruoŧa Sámedikki ságadoalli Lars-Anders Baer.
Árktalaš parlamentáralaččaid konferánsa lágiduvvo juohke nuppi jagi. Doppe deaivvadit válljejuvvon áirasat parlameanttain Canadas, Danmárkkus/Ruonáeatnamis, Eurohpaparlameanttas, Suomas, Islánddas, Norggas, Ruoššas, Ruoŧas ja USA:s. Suoma, Norgga ja Ruoŧa sámedikkit maiddái servet konferánsii iežaset áirasiiguin. Dán jagá konferánsa lágiduvvo Gironis, Ruoŧas borgemánu 2.. gitta 4. b. 2006.
Eanet dieđut:
Lars-Anders Baer, Ruoŧa Sámedikki ságadoalli, +46 70 316 20 56
Aili Keskitalo, Norgga Sámedikki presideanta, +47 97 12 93 05