Sámediggeráđđi lea balus ahte gánnáhahttivuohta ealáhusas ain eanet fuotnána ja rekrutteren boazodollui, jos divadagat eai luvvejuvvo doaibmareaidduin, nugo eará vuođđoealáhusain lea dahkkojuvvon Norggas.
Eahpegovttolaš rámmaeavttut čuhcet erenoamážit nuoraide ásahandásis.
- Lea eahpegovttolaš go boazodoallit fertejit máksit divadiid investeremiin ja reaidduid geavaheames ja installašuvnnain go eará vuođđoealáhusat eai dárbbaš máksit. Eanadoalus leat divadagat luvvejuvvon, ja ii gávdno makkárge govttolaš ágga meannudit boazodolliiguin earáláhkai, deattuha Randi A. Skum, Sámediggeráđi lahttu.
Danne ávžžuha Sámediggeráđđi ovddasvástideaddji departemeanttaid jođáneamos lági mielde čilget divatluvvenášši, vai ášši lea čilgejuvvon dassážii go ođđa boazodoallošiehtadusa 2007/2008 šiehtadallamat álget. Sámediggeráđđi ávžžuha maiddái áššeoasálaččaid boazodoallošiehtadallamiin nannet Boazodoalu ovdánahttinfoandda, vai erenoamážit nuorra doallit ásahandásis sáhttet oažžut dárbbašlaš ovdánahttindoaibmabijuid nugo guođodanbarttaid, áiddiid ja ealihanbohccuid váste. Sámediggeráđi evttohusat ovddiduvvojit Sámedikki boahtte dievasčoahkkimis ja loahpalaš mearrádus sáddejuvvo árvalussan boazodoallo¬šiehtadallamiidda.
- Divatluvven lea deaŧaleamos gánnáhahttivuođa sihkkarastima dihte ealáhusas ja sihkkarastin dihte gilvoeavttuid nuppi vuođđo¬ealáhusa ektui. Muhto mii fertet deattuhit maid eará doaibmabijuid mat sáhttet váikkuhit dárbbašlaš rekrutterema ja guhkes¬áiggi plánema ealáhusas, dadjá Skum.