Sámediggeráđđi háliida gudnejahttit rádjalovssaid dahkan barggu nuppi máilmmesoađi áigge, ja evttoha danne ahte juolluduvvo 1 miljon ruvnno dutkat ja duođaštit rádjalovssaid doaimma, soađi áiggi ja dan maŋŋá.
- Rádjalovssaide ii addojuvvon dat árvu maid sii eahpitkeahttá ánssášedje. Sii gádjo ollu norgalaččaid eallima geat báhtaredje soađi áigge, muhto maŋŋá leat gártan gullat árvvohis šláddariid ja spekulašuvnnaid ja almmolaš meanuid, dadjá Sámedikki várrepresideanta Johan Mikkel Sara.
Sámediggeráđđi eaktuda ahte juolludus geavahuvvo dutkan- ja duođaštanbargui rádjalovsadoaimma oktavuođas sámi guovlluin oppalaččat, ja doaibma Divttasvuonas deattuhuvvo erenoamážit. Barggus deattuhuvvo oppalaš rádjalovsa¬doaibma, eai ge ovttaskas olbmot. Erenoamážit galgá rádjalovssaid dilli deattuhuvvot dego oassin sámiid oktasaš historjjás, go geahččá dáruiduhttin¬politihka olis. Árranis mii lea julevsámi guovddáš lea ovddasvástádus álggahit doaimma.
- Mii háliidit deattuhit ja bidjat fuomášumi movt ja manne olles álbmotčearda eahpiduvvui nugo rádjalovssat erenoamážit sáhttet muitalit, dadjá Sara.