Sámediggeráđđi doarju nu gohčoduvvon hálddahusođastusa čađaheami, dainna eavttuin ahte sámi beroštumit gozihuvvojit dohkálaččat. Ráđđi deattuha dattetge ahte ráđđádallamat Sámedikkiin fertejit čađahuvvot ovdalgo hálddahusođastus sáhttá álggahuvvot.
- Ráđđádallamiid bokte áigut mii čilget ja sihkkarastit makkár oktavuohta ođđa hálddahusdásiid ja sámiid vuoigat¬vuođaid gaskka leat, dan olis go sámit lea álbmot ja eamiálbmot. Dát mearkkaša earret eará dan ahte Sámedikki rolla muđui eará hálddahusdásiid ektui ferte leat čilgejuvvon, dadjá ráđđelahttu Jarle Jonassen.
Jonassen deattuha ahte guovlluide fertejit sihkkarastojuvvot resurssat vai bálvalusaid dássi sáhttá doalahuvvot áiggi mielde. Guovlluide mat leat árbevirolaš sámi geavahan- ja ássanguovllut, ferte dasto sihkkarastojuvvot dárbbašlaš gelbbolašvuohta ja resurssat čuovvolit dan sámepolitihka maid stáhta, guovllulaš ja báikkálaš hálddahusdásit hábmejit. Sámediggái fertejit maid sihkkarastojuvvot resurssat vai dat sáhttá nannet barggus guovlluid ektui. Sámedikki guovlupolitihkalaš doaimmas lea riikarájá rastá perspektiiva.
- Min álbmot ássá njeallji riikkas, ja danne sávvat ahte sámi geavahan- ja ássanguovlluin livččii buoret ovttasbargan vejolašvuohta go dál dálá organiseremiin, oaivvilda Jonassen.