Sámediggeráđđi deaivvada odne Filippiinna mangyan-álbmoga ovddasteaddjiiguin. Čoahkkima ulbmil lea váikkuhit ahte eamiálbmogiid vuoigatvuođat fuolahuvvojit Crew Gold nammasaš fitonodaga nihkkelrogganplánaid oktavuođas Mindoros, Filippiinnain.
Našunála filippiinnalaš eiseválddit leat addán lobi álggahit prošeavtta, muhto báikkálaš álbmot, katolalaš girku ja báikkálaš eiseválddit vuostálastet.
- Crew Gold searvvis leat muhtun muddui norgalaš eaiggádat, ja danne mii háliidit deaivvadit iežamet Filippiina kollegaiguin oaidnin dihtii man muddui Sámediggi sáhttá váikkuhit ahte eamiálbmogiid vuoigatvuođat fuolahuvvojit dán áššis. Jus čájehuvvo ulbmillažžan ja dárbbašlažžan, de mii váldit njuolgga oktavuođa fitnodaga jođihangottiin ja eaiggádiiguin, dadjá sámediggepresideanta Aili Keskitalo.
Seammás oassálastá Sámediggi árjjalaččat ICMMa (ICMM -International Council on Mining and Metals) bargui ráhkadit riikkaidgaskasaš standárddaid fuolahit eamiálbmotberoštusaid riikkaidgaskasaš ruvkeindustriija oktavuođas. ICMM ovddasta máilmmi 13 stuorámus ruvkefitnodaga ja máilmmi 24 našunála ja riikkaidgaskasaš suorgeorganisašuvnna.
- Riikkaidgaskasaš ruvkeindustriija lea ieš sivalaš iežas heajos beaggimii, go lea váilevaš luohttámuš ja váttes ovttasbargodilli industriija ja máilmmi eamiálbmogiid gaskka. Dan dáfus lea ovdáneapmi go industriija ieš dál háliida bidjat standárdda iežas ovttasbargui eamiálbmogiiguin ja sin vuoigatvuođaid dohkkeheapmái.
- Sámedikki ulbmil ovttasbargguin ICMMin lea oažžut industriija dohkkehit eamiálbmogiid vuoigatvuođaid sin eatnamiidda ja resurssaide, álbmotrievtti vuođul. Dárbu lea dahkat eará go dušše buktit čáppa sánit buriid áigumušaid birra, deattuha Keskitalo.