Doarjja smávitlágan biebmobuvttadussii
Sámedikki doarjjastivra lea juolludan doarjaga guovtti nissonolbmui Nyvoll:as, Álttá suohkanis, geat áiguba ásahit smávitlágan biebmobuvttadusa iežaska sávzadoalu vuođđoávdnasiid vuođul.
Almmuhan
Kuhmunen, John-Marcus.
Maŋumustá rievdaduvvon 19.09.2006
Sámedikki doarjjastivrra mielas lea buorre go eanadoalu nissonolbmot háliidit áŋgiruššat buvttaovddidemiin ja árvoháhkamiin iežaset sávzadoalu vuođđoávdnasiid vuođul. Mihttomearrin lea buoridit buvttadusa gánnáhahttivuođa oalgebuktagiiguin. Dát guokte doarjjaoažžu leaba veahážiid mielde bargan ovddosguvlui ásahanstipeandda ja fágamátkkiid vehkiin. Soai leaba lihkostuvvan geahččalanbuvttadusain ja vuovdán bures. Dál soai áiguba eanet dihtomielalaččat bargat iežaska buvttadan¬lokálaid ásahemiin. Soai leaba maid dahkan oalgebuvttašiehtadusa Gildein.
- Dát prošeakta čájeha ahte lea dáhttu bargat buvttaovdánahttimiin ja buvttadit árvvuid báikegottiin. Erenoamáš buorre lea go nissonolbmot čájehit beroštumi ja áŋgirvuođain háhket alcceseaset bargosajiid doppe gos sii ásset, dadjá stivrajođiheaddji Ann-Mari Thomassen.
Sámedikki doarjjastivra lea doallan čoahkkima Ákšovuonas árat dán mánus. Dán čoahkkimis juolluduvvui badjelaš 1 miljon ruvnno doarjjan ealáhusulbmiliidda.