Sámedikki nuoraidpolitihkalaš lávdegoddi ja Sámediggi lágideaba Sámedikki viđat nuoraidkonferánssa bearjadagas golggotmánu 27. – sotnabeaivái 29. beaivái Svanhovd birásguovddážis Svanvikas, olggobealde Girkonjárgga. Konferánssa fáddá lea sámi ealáhusat ja ealáhushutkan.
Mii Sámedikki nuoraidpolitihkalaš lávdegottis (SNPL) áigut čalmmustahttit árbevirolaš ja ođđaáigásaš sámi ealáhusaid. Mii lea dahje sáhttá leat sámi ealáhus ? Movt sáhttet nuorat leat mielde váldime vára ja ovdánahttime sámi ealáhusaid ? Makkár vejolašvuođaiguin ja hástalusaiguin sáhttet nuorat deaividit, geat hálidivčče álggahit muhtun ealáhusadoaimma dahje ásahit fitnodaga?
Dieđihanáigemearri
Dieđihanáigemearri lea golggotmánu 15. b. 2006.
Dieđihandivat mii lea 200 ru., ferte máksojuvvot ovdagihtii ovdal konferánssa. Dieđihandivat máksojuvvo ruovttoluotta sidjiide geat oassálastet konferánssas. Dieđiheapmi dahkko breivviin, e-boasttain dahje faksain. Dieđut maid dárbbbašit, leat namma, čujuhus, e-boastačujuhus ja telefunnummár.
Funky business: Sámi ealáhusat boares ja ođđa gávttiin
Meahccespiinni ja duoji rájes oanehissoaját báidái, boazodollui ja gillii. Mii leat bovden muhtun nuorra sápmelaččaid muitalit iežaset ealáhusaid/fitnodagaid birra, mii lea boahtán dahje ožžon vuođu sámi árbevirolaš dahje ođđamállet ealáhusain (ođđa gákti).
Ungt Entrepenørskap áigu hupmát dan birra movt sáhttá álggahit iežas fitnodaga , ja Sámediggi áigu juohkit dieđuid iešguđetlágan doarjjaortnegiid birra. Lea go dus hui buorre jurdda dahje sávaldat, de lea dus dál vejolašvuohta oažžut neavvagiid ja ráđiid. Dál sávvat ahte DON searvvat ja buvttát iežat oaiviliid ja gažaldagaid mat gusket sámi ealáhusaide.
Lea go politihkka juoga sámi nuoraid várás? Dát boahtá lassin eará suohttasiidda maid sáhtát vásihit konferánssas. Muhtin nuorra Sámediggeáirásat bohtet muitalit makkár sin árgabeaivi lea nuorra olmmožin Sámedikkis. Šaddet joavkobarggut ja digáštallan dievasčoahkkimis. Konferánsa dulkojuvvo sámegielas dárogillii ja nuppeguvlui.
Áigi ja báiki
Konferánsa álgá bearjadaga golggotmánu 27. beaivvi dii. 14.00 (boradeapmi ja sisačáliheapmi dii. 13.00 rájes) Svanhovd birasguovddážis/miljøsenteris. Šaddet eahkesdoalut suohtastallamiin bearjadat- ja lávvordateahkeda. Sotnabeaivvi golggotmánu 29. beaivvi loahpahuvvo konferánsa dii. 12.30, vuolgga dii. 13.30.
Dieđihanskovvi namuhuvvon dieđuiguin sáddejuvvo Sámediggái, Oahpahus-, giella- ja kulturossodahkii, 8270 Drag. Faksa: 75 77 56 88, E-boasta: siri.wernberg@samegiggi.no
Maŋŋel dieđihanáigemeari sáddejuvvo duođaštus, ahte beasat oassálastit ja dieđut mátkki ja orruma birra. Eanet dieđuid oaččut Sámedikki nuoraidpolitihkalaš lávdegottis, Runar Myrnes Baltos, e-boasta: runarmyrnes.balto@same.net, dahje Sámedikkis, tlf. 75 77 56 80.
Hálidat go oassálastit?
Jus leat gaskkal 14 ja 28 jagi soaittát okta sis gii beasat oassálastit konferánssas. Fuomášuhttit ahte eai leat nu ollu sajit. Sámediggi máksá hálbbimus mátkki ja orrungoluid. Dieđihandivat mii lea 200 ru., ferte máksojuvvot ovdagihtii ovdal konferánssa. Dieđihandivat máksojuvvo ruovttoluotta sidjiide geat oassálastet konferánssas. Dieđiheapmi dahkko breivviin, e-boasttain dahje faksain. Dieđut maid dárbbbašit, leat namma, čujuhus, e-boastačujuhus ja telefunnummár.